पुणे, ता. १२ ः कुख्यात गुंड अरुण गवळी याचा स्वीय सहायक बोलत असल्याचे सांगत बांधकाम व्यावसायिकाला पाच कोटी रुपयांची खंडणी मागितल्याचा प्रकार उघडकीस आला आहे. लष्कर पोलिस आणि गुन्हे शाखेच्या खंडणी विरोधी पथक १, युनिट ४च्या पथकाने सापळा रचत चौघांना विमाननगर येथील एका हॉटेलमधून अटक केली.
रोहन शिवाजी गवारे (३०, रा. शीतल अपार्टमेंट, कवडेवाडी, कोरेगाव पार्क), सुदर्शन आसमान गायके (२७, रा. महादेव मंदिरासमोर, महानगर १, वाळुंज, संभाजीनगर) महेंद्र रामनाथ शेळके (४२, रा.
शाहूनाथनगर, बीड) आणि कृष्णा परमेश्वर बुधकर (२६, हनुमान मंदिराजवळ, खामगाव, जि. बीड) अशी अटक करण्यात आलेल्यांची नावे आहेत. याबाबत बांधकाम व्यावसायिक कार्ज मोंटेरो यांनी लष्कर पोलिस ठाण्यात तक्रार दिली.
तक्रारदार हे बांधकाम व्यावसायिक आहेत. सुमीत चौरे हा फिर्यादीचा पूर्वीचा व्यावसायिक भागीदार होता. दोघांमध्ये हॉटेल व्यवसायासंबंधी आर्थिक वाद सुरू असून तो सध्या न्यायालयात प्रलंबित आहे. सुमीत चौरे याने फिर्यादीसाठी हॉटेल व्यवसाय वाढविण्यासाठी आठ कोटी रुपये दिल्याचा दावा केला होता. मात्र, ही रक्कम गुंतवणूक न करता वैयक्तिक फायद्यासाठी वापरल्याचा आरोप त्याने फिर्यादीवर केला. तसेच कोणतेही आर्थिक व्यवहार दाखवले नाहीत आणि बिलही सादर केले नाहीत, असेही त्याचे म्हणणे होते. या वादातूनच आरोपींनी खंडणी उकळण्याचा कट रचला. सुमीत चौरे आणि त्याचे दोन साथीदार यांनी एका अज्ञात क्रमांकावरून फिर्यादी यांना फोन केला. फोनवर त्यांनी आपली ओळख अरुण गवळी यांचा खासगी सहायक प्रशांत पाटील म्हणून करून दिली.
शिवीगाळ करत त्यांच्याकडे सात कोटी रुपयांची खंडणी मागण्यात आली. त्यानंतर लगेश गायके याचा फोन आला त्याने कमीत कमी पाच कोटी देऊन प्रकरण मिटविण्यासाठी दबाव टाकला. सोमवारी (ता. ११) फिर्यादी यांना पाच कोटी रुपये विमाननगर येथील हॉटेलमध्ये घेऊन येण्यास सांगितले. त्यावेळी सापळा रचलेल्या पोलिसांनी आरोपींना ताब्यात घेतले. लष्कर पोलिस ठाण्याचे वरिष्ठ पोलिस निरीक्षक गिरीषकुमार दिघावकर, गुन्हे निरीक्षक प्रदीप पवार, सहायक पोलिस निरीक्षक विशाल दांडगे, उपनिरीक्षक राहुल घाडगे अंमलदार महेश कदम, अतुल मेंगे, सोमनाथ बनसोडे, रमेश चौधरी, गुन्हे शाखेचे खंडणी विरोधी पक्षाचे पोलिस निरीक्षक शैलेश संखे, युनिट ४चे पोलिस निरीक्षक अजय वाघमारे, सहायक पोलिस निरीक्षक राजेश माळेगावे, उपनिरीक्षक राजेश्वर पारे, वैभव मगदूम, अंमलदार प्रवीण ढमाळ, रणजित फडतरे, सयाजी चव्हाण, नीती कांबळे, दुर्योधन गुरव, बालारफी शेख, रहीम शेख आणि मयूर भोकरे यांच्या पथकाने ही कारवार्इ केली.