पुणे, ता. १४ : ‘‘कोणत्या मंडळाने किती वाजता विसर्जन मिरवणुकीत सहभागी व्हावे, हा ज्यांच्या त्याचा प्रश्‍न आहे. मात्र, अनंत चतुर्दशीच्या दिवशी आम्ही सकाळी सात वाजता लक्ष्मी रस्त्यावरील बेलबाग चौकातून विसर्जनासाठी मार्गस्थ होणार,’’ असे शहरातील साठ गणेशोत्सव मंडळांनी गुरवारी ठामपणे सांगितले. वर्षांनुवर्षे मानाच्या गणपतींमुळे विसर्जन मिरवणुकीत विलंब होत आहे. त्यामुळे सर्वांचेच हाल होतात, हे लक्षात घेऊन आम्ही हा निर्णय घेतला असल्याचे त्यांनी यावेळी सांगितले.
विसर्जन मिरणुकीवरून सध्या गणेशोत्सव मंडळांमध्ये वाद निर्माण झाला आहे. त्या पार्श्‍वभूमीवर सुरेश जैन (रामेश्वर चौक तरुण मंडळ), आदेश पारवे (जुन्या जाईचा सार्वजनिक गणेशोत्सव मंडळ), भाऊसाहेब कर्पे (सहकार तरुण मित्रमंडळ), गणेश भोकरे (मुठेश्वर मित्रमंडळ), शैलेश बढाई (बढाई समाज मंडळ), संजय मोरे (श्री संभाजी मित्रमंडळ), राकेश डाखवे (जनार्दन पावळे संघ), राहुल आलमखाने (होनाजी मित्रमंडळ) यांच्यासह साठ मंडळाच्या पदाधिकाऱ्यांनी पत्रकार परिषद घेऊन ही घोषणा केली. ‘‘लक्ष्मी रस्त्यावर काही मानाचे गणपती मंडळ दीर्घकाळ ताबा घेतात. इतर मंडळांना तासन्‌तास रांगेत थांबावे लागते. वर्षांनुवर्षे ही खदखद मंडळांमध्ये आहे. मानाचे गणपती त्यांची परंपरा जपू देत, आम्ही आमच्या पद्धतीने विसर्जन करू,’’ असे यावेळी त्यांनी सांगितले.
संजय मोरे म्हणाले, ‘‘काही मंडळांनीच समाजप्रबोधनाचा मक्ता घेतला आहे का? त्यांच्यावर मात्र कोणतेही नियंत्रण नाही. आमच्यावर मात्र नियम लादले जातात.’’ तर जैन म्हणाले, ‘‘मिरवणुकीत शिस्त राखण्यासाठी प्रशासनाने स्पष्ट व कठोर नियमावली जाहीर करावी.’’ गणेश भोकरे म्हणाले, ‘‘मानाच्या गणपती मंडळांनी त्यांची परंपरा जपावी. आम्ही आमच्या पद्धतीने विसर्जन मिरवणूक काढण्याचा निर्णय घेतला आहे; अन्यथा आम्हालाच काही पावले उचलावी लागतील.’’ विसर्जन मिरवणुकीत कोणताही अनुचित प्रकार घडू नये, पुण्याची बदनामी होऊ नये, यासाठी सरकार व पोलिस प्रशासनाने यावर तत्काळ तोडगा काढावा, अशी मागणी सगळ्याच मंडळांच्या पदाधिकाऱ्यांनी केली.

पदाधिकारी म्हणतात...
१) सकाळी मिरवणूक काढल्याने वाहतुकीवरील ताण कमी होईल
२) पोलिस व महापालिकेवरील ताण कमी होईल
३) विसर्जन मिरवणूकही वेळेत संपेल
४) नागरिकांनाही मिरवणुकीचा आनंद घेता येईल
५) आम्ही या संदर्भात पोलिस आयुक्तांना निवेदन सादर करणार
६) वाद मिटविण्यासाठी सर्व मंडळांनी एकत्र बसून तोडगा काढावा
७) परंतु आम्ही घेतलेला निर्णय कोणत्याही परिस्थितीमध्ये बदलणार नाही