पुणे, ता. १३ : ‘पुणे शहर सार्वजनिक काली पूजा समिती’च्या वतीने ‘श्री श्री श्यामा काली पूजा उत्सव २०२५’ २०, २१ आणि २२ ऑक्टोबरदरम्यान फडके हौद चौक येथील आर.सी.एम. गुजराती स्कूल येथे पार पडणार आहे.
यंदा उत्सवाचे रौप्यमहोत्सवी वर्ष आहे. यात पुणेकरांना धार्मिक, सामाजिक आणि सांस्कृतिक कार्यक्रमांची मेजवानी अनुभवता येणार आहे, अशी माहिती संस्थेचे सचिव सुब्रतो मजुमदार यांनी सोमवारी पत्रकार परिषदेत दिली.
मजुमदार म्हणाले, ‘‘मुख्य पूजा सोमवारी (ता. २०) रात्री नऊ वाजून ४० मिनिटांपासून ते मध्यरात्रीपर्यंत असणार आहे. मंगळवारी (ता. २१) रक्तदान शिबिर, प्रसाद वितरण व सांस्कृतिक कार्यक्रम होणार आहेत. तर, बुधवारी (ता. २२) मिरवणुकीने उत्सवाची सांगता होणार आहे. मिरवणुकीत पश्चिम बंगालच्या पारंपरिक ढाक वाद्यांसह ढोल-ताशा पथकांचे सादरीकरण होईल. पुणेकरांनी या उत्सवामध्ये मोठ्या संख्येने सहभागी व्हावे, असे आवाहन आयोजकांनी केले आहे.