पुणे, ता. २० : सायबर चोरट्यांनी डेक्कन आणि कोथरूड परिसरातील दोन महिलांना शेअर बाजारात मोठ्या परताव्याचे आमिष दाखवत १५ लाख रुपयांचा गंडा घातला. या प्रकरणी डेक्कन आणि कोथरूड पोलिस ठाण्यांत गुन्हे दाखल करण्यात आले आहेत.
डेक्कन पोलिस ठाण्यात दाखल तक्रारीनुसार, एरंडवणे गावठाणातील अमेन सोसायटीमध्ये राहणाऱ्या २८ वर्षीय महिलेच्या मोबाईलवर अज्ञात व्यक्तींनी संपर्क साधला. त्यांनी शेअर बाजारात गुंतवणुकीवर चांगला परतावा देण्याचे आमिष दाखवले. त्यावर विश्वास ठेवून संबंधित महिलेने सहा लाख रुपये त्या व्यक्तीच्या बॅंक खात्यात जमा केले. मात्र, कोणताही परतावा मिळाला नाही. ही बाब लक्षात आल्यानंतर महिलेने पोलिसांत धाव घेतली.
कोथरूडमधील महात्मा सोसायटी येथील कामधेनू सिद्धी अपार्टमेंटमधील एका महिलेसमवेत (वय ४४) आणखी एक प्रकार घडला. सायबर चोरट्याने महिलेच्या मोबाईलवर एक एपीके फाइल पाठवली. ती फाइल उघडताच आरोपींना मोबाईलचा रिमोट ॲक्सेस मिळाला. त्यानंतर चोरट्यांनी महिलेच्या दोन बॅंक खात्यांतून नऊ लाख रुपये परस्पर अन्य खात्यांमध्ये जमा केले. या प्रकरणी कोथरूड पोलिस ठाण्यात गुन्हा दाखल करण्यात आला आहे. दरम्यान, नागरिकांनी अनोळखी लिंक्स, अॅप्स व गुंतवणुकीच्या आमिषापासून सावध राहण्याचे आवाहन सायबर पोलिसांकडून करण्यात आले आहे.