पुणे, ता. २० : भरधाव डंपरने दुचाकीला धडक दिल्याने एका तरुणीचा मृत्यू झाल्याची घटना बाणेर रस्त्यावरील गणेशदत्त मंदिर चौक परिसरात घडली. याप्रकरणी एका महिलेने (वय २८, रा. थेरगाव) तक्रार दिली. त्यावरून बाणेर पोलिस ठाण्यात गुन्हा दाखल करण्यात आला आहे. ही घटना गुरुवारी (ता. १९) मध्यरात्री साडेबाराच्या सुमारास घडली. पोलिसांनी दिलेल्या माहितीनुसार, या दोघी मैत्रिणी गणेशदत्त मंदिर चौकातून ज्युपिटर हॉस्पिटलकडे जाणाऱ्या रस्त्याने निघाल्या होत्या. त्यावेळी भरधाव डंपरने दुचाकीला पाठीमागून धडक दिली. त्यात या दोघी मैत्रिणी गंभीर जखमी झाल्या. या अपघातात तेजल प्रकाश तायडे (वय २७, रा. तलासरी, जि. ठाणे) हिचा मृत्यू झाला. अपघातानंतर डंपरचालक पसार झाला असून, पुढील तपास सहाय्यक पोलिस निरीक्षक अनिल केकाण करीत आहेत.