पुणे, ता. १२ : सक्तवसुली संचालनालयाकडून (ईडी) कारवाई होणार असल्याची भीती दाखवत सायबर चोरट्यांनी आंबेगाव बुद्रुक येथील एका ज्येष्ठ महिलेला ३२ लाख रुपयांचा गंडा घातल्याची घटना उघडकीस आली आहे. या प्रकरणी भारती विद्यापीठ पोलिस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, सायबर चोरट्यांनी फेब्रुवारी महिन्यात तक्रारदार ज्येष्ठ महिलेशी व्हॉट्सॲपवर संपर्क साधला. महिलेच्या नावाने एका कंपनीची नोंदणी झाल्याचे आणि त्यांच्या नावाचा गैरवापर करून एका बँकेत खाते उघडल्याचे सांगण्यात आले. त्या खात्यातून काळ्या पैशांचा व्यवहार झाल्याचा आरोप करून महिलेस ‘ईडी’ची कारवाई होणार असल्याची भीती चोरट्यांनी दाखविली. त्यानंतर मनी लाँड्रिंग करणाऱ्या व्यक्तीचा शोध घेण्यासाठी ज्येष्ठ महिलेकडून बँक खात्याची गोपनीय माहिती मागितली. कारवाई टाळण्यासाठी तातडीने पैसे जमा करावे लागतील, असे सांगून चोरट्यांनी महिलेला ऑनलाइन रक्कम पाठविण्यास भाग पाडले. या दबावाखाली महिलेने गेल्या सात महिन्यांत टप्प्याटप्प्याने ३२ लाख सहा हजार रुपये चोरट्यांच्या खात्यात जमा केले. अखेर फसवणूक झाल्याचे लक्षात आल्यानंतर महिलेने भारती विद्यापीठ पोलिस ठाण्यात तक्रार दिली. या प्रकरणी भारती विद्यापीठ पोलिसांनी गुन्हा दाखल केला आहे. पोलिस निरीक्षक (गुन्हे) जितेंद्र कदम पुढील तपास करीत आहेत.