पुणे, ता. १ : शहरातील पादचारी आणि दुचाकीस्वारांना धमकावून सोनसाखळी, मोबाईल आणि दुचाकी लुटणाऱ्या सराईत चोरट्यास आंबेगाव पोलिसांनी अटक केली. तपासात आरोपीने पाच गुन्हे केल्याचे समोर आले आहे. पोलिसांनी त्याच्याकडून दागिने आणि दुचाकीसह चार लाख रुपयांचा मुद्देमाल जप्त केला आहे.
आकाश नरहरी शिंदे (वय २७, रा. जाधवनगर, वडगाव बुद्रूक) असे अटक केलेल्याचे नाव आहे. कात्रजमधील गुजरवाडी भागात आरोपी शिंदेने एका दुचाकीस्वाराला धमकावून त्याच्याकडील मोबाईल आणि दुचाकी पळवून नेली होती. या प्रकरणी आंबेगाव पोलिसांकडून तपास करण्यात येत होता. दरम्यान, तो मुंबई-बंगळूर बाह्यवळण मार्गावरील दरी पूल परिसरात येणार असल्याची माहिती पोलिस अंमलदार हनुमंत मासाळ आणि चेतन गोरे यांना मिळाली. त्यानुसार पथकाने सापळा रचून त्याला पकडले.
चौकशीत आरोपीने कात्रजमधील एका नागरिकाला धमकावून मोबाईल आणि दुचाकी चोरून नेल्याची कबुली दिली. तसेच, त्याने आंबेगाव, सिंहगड रस्ता, बावधन आणि खडक पोलिस ठाण्याच्या हद्दीत लूटमारीचे पाच गुन्हे केल्याचे निष्पन्न झाले आहे. पोलिस उपायुक्त मिलिंद मोहिते, सहाय्यक आयुक्त राहुल आवारे यांच्या सूचनेनुसार वरिष्ठ पोलिस निरीक्षक शरद झिने, पोलिस निरीक्षक गजानन चोरमले यांच्या पथकातील पोलिस उपनिरीक्षक मोहन कळमकर, शैलेंद्र साठे, चेतन गोरे, हनुमंत मासाळ, नीलेश जमदाडे, हरिश गायकवाड, सुभाष मोरे, धनाजी धोत्रे, सचिन गाडे आदींनी ही कारवाई केली.