पुणे, ता. २ : विदिशा विचार मंच आणि कोहिनूर कट्टा यांच्यातर्फे सुनीताबाई देशपांडे यांच्या जन्मशताब्दीनिमित्त शनिवारी (ता. ६) सुनीताबाई देशपांडे स्मृती साहित्य संमेलनाचे आयोजन केले आहे. या संमेलनाचे अध्यक्षपद ज्येष्ठ साहित्यिक डॉ. अरुणा ढेरे भूषविणार असल्याची माहिती मंचाच्या संस्थापक-संचालक ममता क्षेमकल्याणी यांनी दिली.
शनिवारी सकाळी ९.३० ते दुपारी ३.३० या वेळेत सदाशिव पेठेतील भारत इतिहास संशोधक मंडळाच्या वि.का. राजवाडे सभागृहात होणाऱ्या या संमेलनाचे स्वागताध्यक्ष कोहिनूर ग्रुपचे अध्यक्ष कृष्णकुमार गोयल हे आहेत. संमेलनाचा प्रारंभ पं. सत्यशील देशपांडे यांच्या ‘स्वरांजली’ या कार्यक्रमाने होणार असून ज्येष्ठ दिग्दर्शक जब्बार पटेल यांच्या हस्ते या उद्‍घाटन होईल. दुपारी १२.३० वाजता ‘साहित्यिक सुनीताबाई’ या विषयावर चर्चासत्र आणि दुपारी २.३० वाजता ‘कवितांजली’ हा कार्यक्रम सादर होईल.