पुणे, ता. ३ ः ‘जीएमआरटी’ला (जायंट मीटरवेव्ह रेडिओ दुर्बीण) बाधा निर्माण होत असल्याने रेल्वे मंत्रालयाने प्रस्तावित पुणे-नाशिक हायस्पीडचा लोहमार्ग रद्द केला. ‘जीएमआरटी’पासून सुमारे १२ किलोमीटर अंतरावरून आता नवीन लोहमार्ग होणार आहे. पुणे ते नाशिक लोहमार्ग हा दोन टप्प्यात होत आहे. यात पुणे ते अहिल्यानगर हा सुमारे १३३ किलोमीटरचा लांबीच्या मार्गासाठी सुमारे ८ हजार ९७० कोटी रुपयांचा खर्च अपेक्षित आहे. याचा प्रस्ताव सध्या रेल्वे बोर्डाकडे मंजुरीच्या प्रतीक्षेत आहेत. हा मार्ग सध्याच्या रस्ते महामार्गाला समांतर असणार असून चाकणमार्गे नवीन दुहेरी मार्गिका असणार आहे.
रेल्वेमंत्री अश्विनी वैष्णव यांनी बुधवारी संसदेत या विषयी विचारलेल्या प्रश्नाला उत्तर देताना वरील माहिती दिली. या मार्गाच्या कामाला लवकरच सुरुवात होईल असे त्यांनी सांगितले. कोकण रेल्वेकडून पुणे-नाशिकसाठी दुसऱ्या मार्गासाठी सविस्तर प्रकल्प अहवाल काही महिन्यापूर्वीच रेल्वे बोर्डाला सादर झाला. त्यानुसार हा मार्ग पुणे-चाकण-अहिल्यानगर-निंबळक-पुणतांबा -शिर्डी-नाशिक असा असेल. पुणे-अहिल्यानगर हा रेल्वे मार्ग सध्याच्या महामार्गाला समांतर असणार आहे. तर शिर्डी ते नाशिक यासाठी नवीन मार्ग निश्चित केला आहे. अहिल्यानगरहून नाशिकसाठी नवीन मार्ग असणार आहे. यात अहिल्यानगर-निंबळक-पुणतांबा-शिर्डी-नाशिक या स्थानकाचा समावेश असणार आहे.

महत्त्वाचे
- ‘महारेल’च्या प्रस्तावात हायस्पीडचा रेल्वेचा समावेश होता. आता हा प्रकल्प सेमी हायस्पीडचा असणार आहे
- हा प्रकल्प मध्य रेल्वेचा बांधणी विभाग करणार आहे
- हा रेल्वे मार्ग ‘ब्रॉडगेज’ असेल त्यावरून ताशी १६० ते १८० किमी वेगाने रेल्वे धावू शकेल
- नव्या लोहमार्गामुळे पुणे-नाशिक दरम्यान काही प्रमाणात अंतर व वेळ वाढेल
- पुणे ते नाशिक असा थेट लोहमार्ग होत आहे. सेमी हायस्पीड प्रकल्प असल्याने रेल्वे गाड्या वेगात धावतील

असा आहे प्रकल्प
- पुणे ते अहिल्यानगर (१३३ किमी) : ८ हजार ९७० कोटी रुपयांचा खर्च
- अहिल्यानगर ते निंबळक (६ किमी) : दुहेरीकरणाचे काम प्रगतिपथावर
- निंबळक ते पुणतांबा (८० किमी) : दुहेरीकरण पूर्ण
- पुणतांबा - शिर्डी (१७ किमी) ः २४० कोटी मंजूर
- शिर्डी - नाशिक : डीपीआर सादर मजुरीच्या प्रतीक्षेत