पुणे, ता. ५ : भारतरत्न डॉ. बाबासाहेब आंबेडकर यांच्या महापरिनिर्वाण दिनानिमित्त देशभरातून लाखो भीम अनुयायी दरवर्षी दादर येथील चैत्यभूमीवर अभिवादन करण्यासाठी येतात. या पार्श्वभूमीवर ‘डॉ. बाबासाहेब आंबेडकर संशोधन व प्रशिक्षण संस्था’ (बार्टी), पुणे यांच्या वतीने महामानवाला अभिवादन करण्यासाठी राज्यभर विविध प्रबोधनात्मक उपक्रमांचे आयोजन करण्यात आले आहे.
सामाजिक न्यायमंत्री संजय शिरसाट, सामाजिक न्याय विभागाचे प्रधान सचिव डॉ. हर्षदीप कांबळे आणि बार्टीचे महासंचालक सुनील वारे यांच्या मार्गदर्शनाखाली राज्यातील सर्व जिल्ह्यांत समतादूतांच्या माध्यमातून अभिवादन कार्यक्रम राबवले जाणार आहेत. तसेच संविधानाच्या अमृत महोत्सवी वर्षानिमित्त संविधान जनजागृती उपक्रम राबविण्यात येणार आहेत.
दरम्यान ५ आणि ६ डिसेंबरला दादरच्या शिवाजी पार्क परिसरात बार्टीतर्फे विशेष पुस्तक प्रदर्शनाचे आयोजन करण्यात आले आहे. डॉ. बाबासाहेब आंबेडकर लिखित ग्रंथ, भारताचे संविधान, जनता, बुद्ध आणि त्यांचा धम्म, द प्रॉब्लेम ऑफ रुपी, विविध शासकीय खंड तसेच अन्य महापुरुषांचे मौल्यवान साहित्य अनुयायांसाठी सवलतीच्या दरात उपलब्ध करून देण्यात येत आहे. तसेच भीम अनुयायांसाठी शिवाजी पार्क मैदानात मोफत भोजनाची सोय केली आहे, अशा माहिती ‘बार्टी’तर्फे देण्यात आली.