पुणे, ता. ५ ः शहरातील अनधिकृत अभ्यासिकांवर तातडीने कारवाई करण्याबरोबरच अनधिकृत अभ्यासिका व पेइंग गेस्ट असलेल्या ठिकाणांचे सर्वेक्षण करून त्यांच्यासाठी महापालिकेकडून स्वतंत्र नियमावली तयार केली जाणार आहे. त्याबाबतचा निर्णय पुणे महापालिकेमध्ये अतिरिक्त आयुक्‍तांच्या बैठकीमध्ये घेण्यात आला आहे.
केंद्रीय लोकसेवा आयोग (यूपीएससी) व महाराष्ट्र लोकसेवा आयोगाच्या (एमपीएससी) परीक्षेसह विविध स्पर्धा परीक्षांच्या अभ्यासासाठी राज्याच्या ग्रामीण भागातून विद्यार्थी मोठ्या संख्येने पुण्यात येतात. वेगवेगळ्या अभ्यासिकांमध्ये अभ्यास करतात. स्पर्धा परीक्षांचा निकाल लागल्यानंतर विद्यार्थ्यांकडून केला जाणारा गोंधळ व अन्य विविध कारणांमुळे स्थानिक रहिवाशांना त्रास होत असल्याची तक्रार महापालिकेकडे करण्यात आली होती. त्यासंबंधी महापालिकेचे अतिरिक्त आयुक्त पृथ्वीराज बी. पी. यांनी नुकतीच बैठक घेतली. या बैठकीस महापालिकेच्या अतिक्रमण विभागाचे उपायुक्त सोमनाथ बनकर, परिमंडळ पाचचे उपायुक्त निखिल मोरे, कसबा-विश्रामबाग वाडा क्षेत्रीय कार्यालयाचे साहाय्यक आयुक्त प्रदीप आव्हाड, मुख्य सुरक्षा अधिकारी रमेश शेलार, राष्ट्रवादी काँग्रेस पक्षाचे प्रतिनिधी राहुल देखणे आदी उपस्थित होते.
या बैठकीमध्ये विद्यार्थ्यांमुळे स्थानिक नागरिकांना होणाऱ्या त्रासाबाबत चर्चा करण्यात आली. त्यानंतर, सोसायट्यांच्या पार्किंगमधील अनधिकृत अभ्यासिकांवर तातडीने कारवाई करण्यात यावी, अभ्यासिका, पेइंग गेस्ट यांच्यासाठी स्वतंत्र नियमावली तयार करावी, अनधिकृत अभ्यासिका, पेइंग गेस्ट यांचे सर्वेक्षण करावे, अभ्यासिकांजवळ रात्रीच्या वेळी सुरू राहणाऱ्या व्यवसायांवर कारवाई करावी. मिळकतकर विभागाकडून अभ्यासिका व पेइंग गेस्टचे सर्वेक्षण करावे, यासंदर्भात पुढील १५ दिवसांत पोलिसांसमवेत बैठक घेण्यात यावी, असा निर्णय या बैठकीमध्ये घेऊन त्याबाबतचे आदेश पृथ्वीराज बी. पी. यांनी दिले. दरम्यान, यासंदर्भात १७ डिसेंबर रोजी आढावा बैठक घेतली जाणार असल्याची माहिती पृथ्वीराज बी. पी. यांनी दिली.