पुणे, ता. १८ : कल्याणीनगरमधील भीषण पोर्शे कार अपघातानंतर पोलिसांनी अशा घटना पुन्हा घडू नयेत, यासाठी व्यापक उपाययोजना राबवण्याचा निर्णय घेतला. पोलिस आयुक्त अमितेश कुमार यांनी या प्रकरणात तातडीची कारवाई करीत दीर्घकालीन परिणामकारक धोरणात्मक उपाययोजनांची अंमलबजावणी सुरू केली आहे.
पोर्शे कार अपघातानंतर पोलिसांनी मद्यधुंद अल्पवयीन मुलाला ताब्यात घेतले. त्याचबरोबर त्याचे पालक, बार चालक, मद्य विक्रेत्यांवरही विविध कलमांखाली गुन्हे दाखल केले. बाल न्याय कायद्यानुसार विशेष तरतुदींची पूर्तता करत पोलिस यंत्रणेने हे प्रकरण जलदगतीने पुढे नेले. या अपघातानंतर शहरात तपासणी नाके उभारण्यात आले. विशेषतः रात्री ‘ड्रंक अँड ड्राईव्ह’ मोहीम राबवण्यात येत आहे. शहरात नाकाबंदी करून वाहनचालकांची तपासणी करण्यात येत आहे. पोलिस नियंत्रण कक्षातून सीसीटीव्हीच्या माध्यमातून वाहनांच्या हालचालींवर लक्ष ठेवले जात आहे. सर्व पोलिस ठाण्यांना अल्पवयीन चालकांचे स्वतंत्र डेटाबेस तयार करण्याचे आदेशही दिल्याचे अमितेश कुमार यांनी सांगितले.

राबविलेल्या उपाययोजना
- स्मार्ट पेट्रोलिंग प्रणाली : पोलिस अधिकाऱ्यांचे लोकेशन रिअल टाइममध्ये ट्रॅक करत गस्त वाढवली
- ई-चलन यंत्रणा : नियमभंग करणाऱ्यांवर दंड आकारणी
- साडेतीन हजारांहून अधिक सीसीटीव्ही कॅमेऱ्यांची पुनर्रचना
- महत्त्वाचे चौक, शाळा-महाविद्यालय परिसर, बार व हाय-प्रोफाइल परिसरामध्ये लक्ष
- स्कूल-झोन आणि संवेदनशील क्षेत्रांमध्ये विशेष पथकांची नियुक्ती
- अल्पवयीन वाहनचालकांवर नजर
- अपघात टाळण्यासाठी पालकांची जबाबदारी अधोरेखित

पुण्यात रात्री दीड वाजल्यानंतर सुरू असलेल्या पब-बार चालकांवर कठोर कारवाई करण्यात येत आहे. ‘ड्रंक ॲंड ड्राईव्ह मोहिमेंतंर्गत दीड वर्षात यापूर्वीच्या तुलनेत चौपट कारवाई केली आहे. नियमांचे उल्लंघन करणाऱ्या आणि अल्पवयीन मुलांना प्रवेश देणाऱ्या पब- बारचालकांचे परवाने रद्द करण्यात येतील.
- अमितेश कुमार, पोलिस आयुक्त, पुणे शहर