पुणे, ता. ५ : दुरुस्तीच्या नावाखाली शहरातील रस्ते खरवडून ठेवले जातात. त्यांचे तातडीने डांबरीकरण होणे अपेक्षित असताना त्यास अनेक दिवस लागत आहेत. जिथे रस्ते दुरुस्त केले जात आहेत, त्या ठिकाणी केवळ डांबराचे ठिगळे लावण्याचा प्रकार घडत आहे, त्यामुळे खरवडलेले रस्ते तत्काळ दुरुस्त करावेत, अशी मागणी ग्राहक पंचायतीने केली आहे.
महापालिकेच्या पथ विभागाने शहरातील रस्ते दुरुस्त केल्याचा दावा केला आहे. मात्र दुरुस्तीसाठी रस्ते खरवडून ठेवले जातात. दोन दिवसांत डांबरीकरण करण्याऐवजी ८ ते १० दिवस लागत आहेत. खरवडलेल्या रस्त्यांवरून जाताना वाहनचालकांना त्रास होत आहे. डांबरीकरण झालेले रस्ते समपातळीमध्ये आणले जात नाहीत. तसेच सपाटीकरणही व्यवस्थितपणे केले जात नाही. त्यामध्ये कुठेही समानता दिसत नसून खरवडलेले रस्ते तत्काळ दुरुस्त करण्याची मागणी ग्राहक पंचायतीचे अध्यक्ष विलास लेले व ग्राहक पंचायतीचे केंद्रीय सदस्य विजय सागर यांनी महापालिका आयुक्त नवलकिशोर राम यांच्याकडे पत्राद्वारे केली आहे.