संतोष खुटवड : सकाळ वृत्तसेवा
पुणे, ता. ८ : सातारा येथील शाहू मैदानात होणाऱ्या ९९ व्या अखिल भारतीय मराठी साहित्य संमेलनात ब्रेल लिपीमधील विविध विषयांनी नटलेल्या पाच पुस्तकांचे प्रकाशन होणार आहे. या पुस्तकांच्या प्रती राज्यातील ४२ अंधशाळांतील विद्यार्थ्यांना तसेच ग्रंथालयांना भेट दिल्या जाणार आहेत.
कथासंग्रह, कादंबरी, नाटक, वैचारिक आदी विषयांवर आधारित पुस्तके यात आहेत. सर्वसामान्य वाचकांप्रमाणे दृष्टिहीनांनाही उत्कट साहित्याची अनुभूती घेता येईल. साहित्य संमेलनात ब्रेल लिपीतील पुस्तक प्रकाशनाद्वारे सामाजिक जाण व साहित्यिक संवेदना यांचे अनोखे दर्शन साहित्यप्रेमींना होणार आहे, अशी भावना ‘चपराक प्रकाशन’चे घनश्याम पाटील यांनी व्यक्त केली.
सामाजिक बांधिलकी म्हणून पुणे येथील इंडियाना सुक्रो टेक प्रा. लि.चे संचालक प्रमोदकुमार बेलसरे यांनी याबाबत पुढाकार घेतला आहे. त्यांनी ‘सीएसआर’ फंडातून पुस्तकांसाठी निधी उपलब्ध करून दिला आहे. स्वागत थोरात यांनी मुद्रणासाठी योगदान दिले आहे.

‘‘साहित्य संमेलनात ब्रेल लिपीतील पुस्तकांचे प्रकाशन अनोखे ठरणार आहे. ही पुस्तके दृष्टिहीनांसाठी ज्ञानाचे आणखी एक व्यापक अवकाश खुले करतील.
- प्रमोदकुमार बेलसरे, संचालक, इंडियाना सुक्रो टेक पुणे प्रा. लि.

वाङ्‌मय, संस्कृती आणि सामाजिक बांधिलकीतून ब्रेल लिपीतील पाच नव्या पुस्तकांचे प्रकाशन होणार आहे. आपल्याकडे ज्ञानाचे प्रचंड भांडार आहे. ते ब्रेल लिपीच्या माध्यमातून दृष्टिहीन वाचकांपर्यंत पोचविण्याचा प्रयत्न करीत आहे. त्यासाठी अखिल भारतीय मराठी साहित्य संमेलनाच्या शताब्‍दी वर्षात सुमारे ५० ब्रेल पुस्तके प्रकाशित करण्याचा मानस आहे.
- घनश्याम पाटील, मुख्य समन्वयक, प्रकाशन कट्टा, अखिल भारतीय मराठी साहित्य संमेलन

या पुस्तकांचा असणार समावेश
- राखणदार : चंद्रलेखा बेलसरे
- शिक्षणाचे पसायदान : संदीप वाकचौरे
- चक्र आणि इतर नाटके ः डॉ. सोमनाथ मुटकुळे
- रॅगिंगचे दिवस : सुहास कोळेकर
- सत्यापितम : चंद्रलेखा बेलसरे
74698, 74776