पुणे, ता. ८ : गेल्या काही दिवसांपासून हवामानात झालेल्या बदलांमुळे शहरातील किमान तापमानात मोठी वाढ झाली होती. मात्र, सोमवारी (ता. ८) किमान तापमानात लक्षणीयरीत्या घट नोंदविण्यात आली आहे. त्यामुळे शहरात थंडीचा कडाका वाढला आहे. पुढील तीन दिवसांत किमान तापमानात आणखी घट होणार असल्याची शक्यता भारतीय हवामानशास्त्र विभागाने वर्तविली आहे. त्यामुळे पुढील काही दिवस शहरातील थंडी कायम राहणार असल्याची शक्यता आहे.
पुणे आणि परिसरात किमान आणि कमाल तापमानामध्ये चढ-उतार कायम आहे. गेल्या काही दिवसांपूर्वी किमान तापमानामध्ये वाढ होऊन, १५ अंश सेल्सिअसपर्यंत नोंदविण्यात आले होते. मात्र, सोमवारी त्यामध्ये चार अंश सेल्सिअसची घट होऊन ते ११.३ अंश सेल्सिअसपर्यंत खाली घसरले आहे. कमाल तापमानातदेखील किंचित घट झाली आहे. पुढील तीन ते चार दिवसांत किमान आणि कमाल तापमानात आणखी घट होणार असून, किमान तापमान ९ अंश सेल्सिअसपर्यंत नोंदविण्यात येणार असल्याचे हवामानशास्त्र विभागाने सांगितले आहे.
पुणे आणि परिसरामध्ये मंगळवारी (ता. ९) किमान तापमानात किंचित घट होणार असून, ११ अंश सेल्सिअस इतके तर कमाल तापमान २९ अंश सेल्सिअसपर्यंत नोंदविण्यात येणार आहे. आकाश मुख्यतः निरभ्र राहण्याची शक्यता आहे. मात्र बुधवारपासून (ता. १०) कमाल तापमानात किंचित वाढ तर किमान तापमानात आणखी घट होण्याची शक्यता आहे. कमाल तापमान ३० अंश सेल्सिअसपर्यंत तर किमान तापमान ९ अंश सेल्सिअसपर्यंत नोंदविण्यात येणार आहे. आकाश मुख्यतः निरभ्र राहण्याची शक्यता हवामानशास्त्र विभागाने वर्तविली आहे.
-------------------