पुणे, ता. ३ ः मराठा चेंबर ऑफ कॉमर्स, इंडस्ट्रीज अॅण्ड ॲग्रिकल्चरतर्फे (एमसीसीआयए) मंगळवारी (ता. ९) ‘पुणे ग्लोबल कपॅबिलिटी सेंटर’ (जीसीसी) या आंतरराष्ट्रीय परिषदेचे आयोजन करण्यात आले आहे. संस्थेच्या सेनापती बापट रस्त्यावरील कार्यालयात दुपारी तीन ते रात्री आठ दरम्यान ही परिषद पार पडेल. परिषदेत विविध विषयांवरील चर्चासत्रांमधून २० हून अधिक बहुराष्ट्रीय कंपन्यांचे प्रतिनिधी उपस्थितांना मार्गदर्शन करणार आहेत.
प्रशिक्षित मनुष्यबळ आणि उत्तम पायाभूत सुविधा यामुळे अनेक बहुराष्ट्रीय कंपन्यांनी ग्लोबल कपॅबिलिटी सेंटर्स (जीसीसी) स्थापण्यासाठी भारताची निवड केल्याचे दिसून येते. सध्या देशात एक हजार ६०० जीसीसी असून त्यात १६ लाखांहून अधिक तंत्रज्ञ काम करतात. देशातील २० टक्के जीसीसी महाराष्ट्रात असून वेगाने वाढणाऱ्या पुणे शहरास अनेक कंपन्यांनी पसंती दर्शविली आहे. पुण्यात अधिकाधिक जीसीसी यावेत आणि येथील प्रशिक्षित तरुणांना नोकऱ्यांची संधी उपलब्ध व्हावी, यासाठी प्रशासन, खासगी कंपन्या आणि मनुष्यबळ विकास क्षेत्रातील तज्ज्ञांना एका व्यासपीठावर आणण्याचे काम पुणे जीसीसी परिषद करेल, असा विश्वास ‘एमसीसीआय’ने व्यक्त केला आहे.
देशातील ‘जीसीसी’च्या वाढीमध्ये महाराष्ट्राची भूमिका या विषयी महाराष्ट्र औद्योगिक विकास महामंडळाचे (एमआयडीसी) मुख्य कार्यकारी अधिकारी डॉ. पी. वेलरासू मार्गदर्शन करतील. महानगरपालिकेचे आयुक्त नवल किशोर राम आणि अतिरिक्त आयुक्त पृथ्वीराज बी. पी. हेही यासंदर्भात आपले विचार मांडणार आहेत. ‘जीसीसी’संदर्भात महाराष्ट्राने स्वतंत्र धोरण आखावे व पुणे हे ‘जीसीसी’साठीचे मुख्य केंद्र व्हावे, यादृष्टीने या परिषदेत चर्चा होणार आहे.