मांजरी बुद्रुकला आज
सप्त पादुकादर्शन सोहळा
मांजरी, ता. १९ : मांजरी-मुंढवा रस्त्यावरील माऊलीनगर येथे मांजरी बुद्रूक, केशवनगर, साडेसतरानळी, शेवाळेवाडी, महादेवनगर परिसरातील भाविकांसाठी श्री सद्‍गुरू मूळ सप्त पादुकादर्शन सोहळ्याचे रविवारी (ता. २१) आयोजन केले आहे. सेवेकरी अमित घुले यांनी या सोहळ्याचे आयोजन केले आहे.
या सोहळ्यात श्री क्षेत्र पिठापूर येथील श्री दत्त महाराज पादुका, श्री क्षेत्र अक्कलकोट येथील श्री स्वामी समर्थ महाराजांनी २१ वर्षे वापरलेल्या रक्तचंदन पादुका, शिर्डी येथील श्री साईनाथ महाराज पादुका, शेगाव येथील श्री गजानन महाराज पादुका, धनकवडी येथील योगीराज शंकर महाराज पादुका, आदमापूर येथील श्री बाळूमामा पादुका तसेच, फलटण-वेडणी येथील श्री सद्‍गुरू शिवाजी महाराज पादुका भाविकांच्या दर्शनासाठी ठेवण्यात येणार आहेत.
रविवारी सकाळी या पादुकांची मिरवणूक काढण्यात येणार असून त्यानंतर स्वामी समर्थ समाधी मठ, अक्कलकोट येथील श्री अन्नू महाराज यांच्या हस्ते सर्व पादुकांचा अभिषेक व पूजा होणार आहे. दुपारी २ ते रात्री ९ वाजेपर्यंत भाविकांना या पादुकांचे दर्शन घेता येणार आहे. सायंकाळी महाआरतीनंतर स्वरसाधना युथ म्युझिकल ग्रुप यांचा भक्तिसंगीताचा कार्यक्रम आयोजित केला आहे. तसेच, भाविकांसाठी दुपारी २ ते रात्री ९ वाजेपर्यंत महाप्रसादाचे आयोजन केले आहे. सप्त पादुकादर्शन सोहळ्यात परिसरातील भाविकांनी सहभागी व्हावे, असे आवाहन सेवेकरी अमित घुले व तुषार घुले मित्रपरिवाराने केले आहे.