पुणे, ता. २३ ः ‘‘पहिले पंतप्रधान पंडित जवाहरलाल नेहरू बालकांना देशाचे भविष्य समजून, ‘आजची मुले उद्याचा भारत’ असे म्हणत असत. मुलांचे शिक्षण, आरोग्य आणि विचारस्वातंत्र्य हे राष्ट्र उभारणीचे मूळ समजत आणि म्हणूनच समस्त ‘विविध जाती, धर्मीय समस्त बालकांप्रती आत्मीयतेने वागणारे पं. नेहरूंचे व्यक्तिमत्त्व मानवतेचा साक्षात्कार देणारे होते,’’ असे मत काँग्रेस नेते गोपाळ तिवारी यांनी केले.
राजीव फाउंडेशन व लोहगाव येथील जे. के. अबॅकस कोचिंग क्लासेस यांच्या वतीने महात्मा गांधी व पं. नेहरू यांच्या जयंतीनिमित्त आयोजित लहान मुलांसाठी चित्रकला स्पर्धा व अबॅकसमधील आंतरराष्ट्रीय पातळीवरील विजेत्या मुलांचे पारितोषिक वितरण कार्यक्रमात ते बोलत होते. यावेळी महाराष्ट्र गांधी स्मारक निधीचे सचिव अन्वर राजन म्हणाले की, जनतेने देशाचे भवितव्य डोळ्यांसमोर ठेवून सरकार व लोकप्रतिनिधी निवडण्याचा हक्क नागरिकांनी कोणत्याही प्रलोभनास बळी न पडता घेणे हीच खऱ्या लोकशाहीची गरज आहे.