पुणे, ता. २४ : झोपडपट्टी पुनर्वसन प्राधिकरणाच्या (एसआरए) वसाहतीतील नियोजित इमारतीच्या बांधकामस्थळी पंधराव्या मजल्यावरून पडून एक मजूर गंभीर जखमी झाल्याची घटना दांडेकर पूल परिसरात घडली. बांधकामस्थळी सुरक्षाव्यवस्था न केल्याप्रकरणी संबंधित ठेकेदाराविरुद्ध पर्वती पोलिस ठाण्यात गुन्हा दाखल करण्यात आला आहे.
चैतू बोसाक (रा. दांडेकर पूल, पर्वती) असे गंभीर जखमी झालेल्या मजुराचे नाव आहे. याप्रकरणी ठेकेदार राज दास (वय २४, रा. बिहार) याच्याविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, दांडेकर पूल परिसरातील आंबिल ओढा येथे ‘एसआरए’अंतर्गत इमारतीचे बांधकाम सुरू आहे. सोमवारी (ता. २२) दुपारी बोसाक पंधराव्या मजल्यावर काम करताना तोल जाऊन खाली पडला. या अपघातात तो गंभीर जखमी झाला असून त्याच्यावर रुग्णालयात उपचार सुरू आहेत. या घटनेची माहिती मिळताच वरिष्ठ पोलिस निरीक्षक नंदकुमार गायकवाड आणि पोलिस निरीक्षक अनिता हिवरकर यांनी घटनास्थळी भेट दिली. ठेकेदाराच्या निष्काळजीपणामुळे ही दुर्घटना घडल्याचे स्पष्ट झाल्यानंतर संबंधित ठेकेदाराविरुद्ध गुन्हा दाखल करण्यात आला आहे.