पुणे, ता. २४ : महापालिका निवडणुकीत महाविकास आघाडीकडे वंचित बहुजन आघाडीने ४१ जागांची मागणी केली आहे. सध्या महाविकास आघाडीसोबत युतीसाठी चर्चा सुरू असून, काँग्रेससोबतची प्राथमिक बैठक पूर्ण झाली आहे. तर राष्ट्रवादी काँग्रेस पक्षासोबतची महत्त्वाची बैठक बुधवारी रात्री उशिरा होणार असल्याची माहिती पक्षाकडून देण्यात आली. आत्तापर्यंत ‘वंचित’ने जागांसंदर्भात कोणताही लेखी प्रस्ताव दिला नसून केवळ तोंडी चर्चा सुरू आहेत.
पुणे महापालिकेत महाविकास आघाडीमधील घटक पक्षांनी २०१७ मधील निवडणुकीत जिंकलेल्या जागांव्यतिरिक्त नव्या जागांचा विचार करण्याची मागणीही ‘वंचित’ने केली आहे. राष्ट्रवादी काँग्रेस शरदचंद्र पवार पक्षाच्या खासदार सुप्रिया सुळे यांच्या उपस्थितीत बुधवारी उशिरा वंचित आघाडीची बैठक होणार होती, या बैठकीला जाण्यापूर्वी ‘वंचित’चे शहराध्यक्ष ॲड. अरविंद तायडे म्हणाले, ‘‘आम्ही सुप्रिया सुळे यांच्याशी ४१ जागांची चर्चा करणार आहोत. आमचा सन्मान राखला जावा एवढीच अपेक्षा आहे.’’
दरम्यान, या बैठकीतही जागांची तोंडी मागणी करण्यात येणार असून, संभाव्य युतीची रूपरेषा निश्चित करण्यावर भर दिला जाणार आहे. तसेच ‘वंचित’कडून गुरुवारी लेखी प्रस्ताव महाविकास आघाडीतील पक्षांना दिला जाण्याची शक्यता आहे.