पुणे, ता. २४ : जिल्हाधिकारी जितेंद्र डुडी यांच्या मार्गदर्शनाखाली स्वारगेट मेट्रो स्टेशन येथे राष्ट्रीय ग्राहक दिन आयोजित करण्यात आला होता. या कार्यक्रमाला नागरिकांचा मोठा प्रतिसाद मिळाला. यावेळी जिल्हा पुरवठा अधिकारी महेश सुधळकर, अखिल भारतीय ग्राहक पंचायत पुणे महानगरचे अध्यक्ष विलास लेले, जिल्हा ग्राहक संरक्षण परिषदेचे सदस्य ॲड. तुषार झेंडे, सदस्या ॲड. अनिता गवळी आदी उपस्थित होते.
ग्राहकांचे फसवणुकीपासून संरक्षण करण्यासोबत त्यांच्या हक्काबाबत जागरूक करणे तसेच त्यांची फसवणूक झाल्यास ग्राहक तक्रार निवारण यंत्रणेबाबत माहिती देण्यासाठी जिल्हा प्रशासनाच्यावतीने विविध जनजागृतीपर कार्यक्रमाचे आयोजन करण्यात येते, याचा नागरिकांना लाभ घ्यावा, असे आवाहन सुधळकर यांनी केले. लेले म्हणाले, ‘‘ग्राहकांची फसवणूक टाळण्यासाठी अखिल भारतीय ग्राहक पंचायतीच्यामार्फत ग्राहकांना मोफत सल्ला देण्यात येतो.’’
ग्राहकांची फसवणूक झाल्यास १९१५ या हेल्पलाइन क्रमांक किंवा e-jagriti.gov.in या संकेतस्थळाद्वारे तक्रार दाखल करता येते, असे आवाहन ॲड. झेंडे यांनी केले आहे.