पुणे, ता. २५ ः नरवीर तानाजी मालुसरे रस्त्यावरून (सिंहगड रस्ता) जाताना ओव्हरहेड केबल गळ्याभोवती अडकून दुचाकीस्वार गंभीर जखमी झाल्याची घटना घडली होती. मात्र त्यानंतरही महापालिका प्रशासन ओव्हरहेड केबलबाबत जागे होण्यास तयार नाही. बेकायदा ओव्हरहेड केबलचे जाळे काढून टाकण्याकडे दुर्लक्ष करणारे महापालिका प्रशासन आता नागरिकांचे जीव जाण्याची वाट पाहत आहे का? अस प्रश्‍न आता उपस्थित होऊ लागला आहे.
सिंहगड रस्त्यावरील संतोष हॉल परिसरातून दुचाकीवरून जाणाऱ्या तरुणाच्या गळ्यात अचानक ओव्हरहेड केबल अडकल्याने तरुणाच्या गळ्याला गंभीर दुखापत झाली होती. शहरातील रस्ते, वृक्ष, उड्डाण पूल, पथदिवे, सिग्नल यंत्रणा, इमारतींवर विविध केबलचे जाळे पसरलेले आहे. अनेकदा केबल रस्त्यावरच लटकलेल्या अवस्थेत असतात. रस्त्यात लटकणाऱ्या केबलमुळे नागरिकांच्या जीवाला धोका निर्माण होत असूनही या केबल काढण्यासाठी महापालिका प्रशासनाकडून ठोस प्रयत्न होत नाहीत. या प्रश्‍नावर ‘सकाळ’ लक्ष वेधले होते. त्यानंतर महापालिका प्रशासनाकडून तोंडदेखली कारवाई झाली. महापालिकेने ओव्हरहेड केबलबाबत धोरण तयार केलेले असतानाही कारवाई मात्र होत नाही.

केबल काढण्यासाठी यंत्रणेचा अभाव
रस्त्यांवरील बेकायदा केबलवरील कारवाईवरून महापालिकेचा पथ, विद्युत व आकाशचिन्ह या तिन्ही विभागांकडून एकमेकांवर टोलवाटोलवी केली जाते. विद्युत विभागाने केबल काढण्याचे काम केले तरीही संबंधित व्यावसायिकाविरुद्ध गुन्हा दाखल करण्याचे काम आकाशचिन्ह विभागाने करणे गरजेचे असते. प्रत्यक्षात तसे होत नाही.

विद्युत विभागाकडून ओव्हरहेड केबल काढण्याची कारवाई नियमितपणे केली जाते. केबल काढण्यासाठी स्वतंत्र यंत्रणा नाही आणि संबंधित व्यावसायिकांविरुद्ध गुन्हे दाखल करण्याचे अधिकारही आकाशचिन्ह विभागाकडे आहेत.
- मनीषा शेकटकर, प्रमुख, विद्युत विभाग, महापालिका