मार्केट यार्ड, ता. २५ : बाजार समितीच्या आवारात चोरट्यांचा सुळसुळाट वाढत चालला आहे. शेतीमाल चोरीसह आता कामगारांवर हल्ले होण्याच्या घटनाही समोर आल्या आहेत.
सोमवारी रात्री गाळा क्रमांक १७८ वर झोपलेल्या कामगारांवर कांदे फेकून मारण्यात आले, तसेच काही जणांना लाथाबुक्क्यांनी मारहाण करण्यात आली. त्यामुळे रात्री १० ते सकाळी ३ वाजेपर्यंत हॉटेल्स, पानटपऱ्या बंद ठेवाव्यात, अशी मागणी छत्रपती शिवाजी महाराज कामगार युनियनचे अध्यक्ष संतोष नांगरे यांनी सभापती व सचिवांकडे पत्राद्वारे केली आहे. यावर कार्यवाही न झाल्यास ३० जूनला संपूर्ण कांदा-बटाटा विभाग बंद ठेवण्याचा इशारा युनियनने दिला आहे.
याबाबत बाजार समितीचे सचिव डॉ. राजाराम धोंडकर म्हणाले, विभागप्रमुखांना सूचना दिलेल्या आहेत. तसेच पोलिसांनी रात्रीची गस्त वाढवावी.