पुणे, ता. १ : राष्ट्रगीत ‘वंदे मातरमला यंदा १५० वर्षे पूर्ण होत आहेत. या पार्श्वभूमीवर मुलांना स्वतंत्रपणे चित्र काढण्यासाठी, रंगविण्यासाठी आणि कल्पना मांडण्यासाठी प्रोत्साहित करण्याच्या उद्देशाने ‘आर्ट इंडिया फाउंडेशन खुला आसमान’ आणि भारतीय इतिहास संकलन समितीच्या ‘वंदे मातरम सार्धशती जयंती समारोह समिती’तर्फे ‘आर्ट ऑफ मदर लँड वंदे मातरम ची १५० वर्षे’ या चित्रकला स्पर्धेचे आयोजन करण्यात आले आहे.

ही स्पर्धा १० वर्ष आणि त्याहून अधिक वयाच्या मुलं, तरुण, तसेच ज्येष्ठ नागरिकांसाठी खुली असून पूर्णपणे निःशुल्क आहे. स्पर्धेचा सहभाग पूर्णपणे ऑनलाइन असून, सहभागी कलाकारांनी स्वतःच्या चित्राचा स्पष्ट फोटो काढून तो www.indiaart.com या संकेतस्थळावर फॉर्म भरून १५ सप्टेंबरपर्यंत अपलोड करावा.

या स्पर्धेसाठी ‘माझ्या कल्पनेतील भारत माता’, ‘ओळींतून उमलले चित्र’, ‘वंदे मातरम्’च्या रंगछटांमध्ये भारत’, वंदे मातरम - भाषा, संस्कृती आणि एकता हे विषय देण्यात आले असून स्पर्धेच्या विजेत्यांना पुरस्कार आणि प्रमाणपत्र देण्यात येईल. तसेच सर्व सहभागींना डिजिटल प्रमाणपत्र देण्यात येईल.
----------------------