पुणे, ता. २ : फाइल गहाळ झाल्याचे सांगून ती शोधण्यासाठी तक्रारदाराकडून दीड हजार रुपयांची लाच घेताना जिल्हा ग्राहक तक्रार निवारण आयोगातील लिपिकाला लाचलुचपत प्रतिबंधक (एसीबी) विभागाने ताब्यात घेतले. ही कारवाई नवीन प्रशासकीय इमारतीच्या आवारातील उपाहारगृहाजवळ करण्यात आली.
योगेश दत्तात्रेय चवंडके (वय ३७) असे लाच मागणाऱ्या वरिष्ठ लिपिकाचे नाव आहे. त्याच्याविरुद्ध बंडगार्डन पोलिस ठाण्यात भ्रष्टाचार प्रतिबंध अधिनियमान्वये गुन्हा दाखल करण्यात आला आहे.
तक्रारदाराचा २०२२ मध्ये मोटार अपघात झाल्यानंतर त्यांनी नुकसान भरपाईसाठी विमा कंपनीविरुद्ध ग्राहक तक्रार निवारण आयोगात दावा दाखल केला होता. या दाव्याच्या सुनावणीसाठी तक्रारदार आयोगात गेला असता, ‘तुमची फाइल गहाळ झाली आहे’, असे चवंडके याने सांगितले. त्यानंतर फाइल शोधून देण्याच्या मोबदल्यात चवंडकेने दोन हजार रुपयांची लाच मागितली. तडजोडीनंतर दीड हजार रुपये देण्याचे ठरले. तक्रारदाराने याबाबत लाचलुचपत प्रतिबंधक विभागाच्या कार्यालयात तक्रार केली. चवंडकेने तक्रारदाराला मंगळवारी (ता. १) दुपारी उपाहारगृहाजवळ बोलावले. फाइल मिळाल्याचे सांगत लाच स्वीकारताना ‘एसीबी’च्या अधिकाऱ्यांनी त्याला पकडले. पोलिस अधीक्षक शिरीष सरदेशपांडे, अतिरिक्त पोलिस अधीक्षक डॉ. शीतल जानवे यांच्या मार्गदर्शनाखाली पोलिस निरीक्षक प्रवीण निंबाळकर यांच्या पथकाने ही कारवाई केली.