पुणे, ता. ३ : शहराचा ऐतिहासिक आणि सांस्कृतिक वारसा असलेला विश्रामबागवाडा लवकरच नागरिकांसाठी खुला होणार आहे. या वाड्याच्या दर्शनी भागाचे जतन व संवर्धनाचे काम जुलैअखेरीस पूर्ण होणार असल्याची माहिती महापालिकेने दिली आहे.

हेरिटेज सेलमार्फत गेली दोन वर्षे सुरू असलेल्या या कामाला गती मिळाली आहे. या भागातील प्राचीन लाकडी सज्जा आणि महिरप मूळ स्वरूपात उभारण्यासाठी तज्ज्ञांच्या मदतीने काम करण्यात आले. त्यामुळेच या कामास अपेक्षेपेक्षा अधिकवेळ लागला, असे महापालिकेचे उपअभियंता सुनील मोहिते यांनी स्पष्ट केले. विश्रामबागवाडा १७५० मध्ये दुसरे पेशवे बाजीराव यांनी विकत घेतला होता. पुढे १८१० मध्ये येथे वाडा बांधला. १९३० ते १९६० दरम्यान पुणे महापालिकेचे मुख्यालय येथे कार्यरत होते. वाड्यातील दालन क्रमांक १ व २ नागरिकांसाठी आधीच खुले झाले असून, लवकरच दर्शनी भागही खुले होईल. हा ऐतिहासिक ठेवा महापालिकेनेच जपावा किंवा जबाबदार संस्थेकडे सोपवावा, अशी मागणी क्रिएटिव्ह फाउंडेशनचे अध्यक्ष संदीप खर्डेकर यांनी केली आहे.
हा वाडा खुला व्हावा, यासाठी खर्डेकर पाठपुरावा करीत होते. विश्रामबागवाडा हे पुणेकरांसह पर्यटकांसाठीही आकर्षण ठरणार असून, या वारशाचे संरक्षण महत्त्वाचे असल्याचे त्यांनी नमूद केले. या वाड्यात सध्या एक टपाल कार्यालय आणि पीएमपीचे पास केंद्र कार्यरत आहे.