पुणे, ता. ५ : आषाढी एकादशीनिमित्त आर्य संगीत प्रसारक मंडळातर्फे आयोजित ‘संतवाणी’ हा विशेष कार्यक्रम अभंग सादरीकरणांनी रंगला. किराणा घराण्याच्या गायकांनी सादर केलेल्या कार्यक्रमाने रसिकांना आनंद दिला. भरत नाट्य मंदिरात झालेल्या या कार्यक्रमात पं. भीमसेन जोशी यांचे शिष्य पं. उपेंद्र भट, आनंद भाटे, पं. भीमसेन जोशी यांचे सुपुत्र व शिष्य श्रीनिवास जोशी आणि नातू विराज जोशी यांनी सादरीकरण केले. ‘आता कोठे धावे मन’, ‘इंद्रायणी काठी’, ‘नामाचा गजर’, ‘तीर्थ विठ्ठल, क्षेत्र विठ्ठल’, ‘माझे माहेर पंढरी’ आदी अभंग सादर झाले. ‘जो भजे हरी को सदा’ या भैरवीने कार्यक्रमाचा समारोप झाला. पांडुरंग पवार (तबला), अविनाश दिघे (संवादिनी), राहुल गोळे (ऑर्गन), गंभीर महाराज (पखवाज), माऊली टाकळकर (टाळ) यांनी साथसंगत केली. उल्हास पवार यांनी निरूपण केले.