पुणे, ता. ५ : औंध परिसरात दहशत माजवून पसार झालेल्या सराईतांच्या टोळीला चतु:शृंगी पोलिसांनी अटक केली. त्यांच्याकडून देशी बनावटीचे पिस्तूल, तीन कोयते, मोटार, दुचाकी असा सात लाख ६० हजार रुपयांचा मुद्देमाल जप्त केला आहे.
प्रतीक सुनील कदम (वय २६), अमीर अल्लाउद्दीन शेख (वय २८), समीर अल्लाउद्दीन शेख (वय २६), जय सुनील घेंगट (वय २१), अभिषेक अरुण आवळे (वय २४, सर्व रा. कस्तुरबा गांधी वसाहत, औंध), अतुल श्याम चव्हाण (वय २८, रा. डॉ. बाबासाहेब आंबेडकर वसाहत, औंध) व रॉबिन दिनेश साळवे (वय २६, रा. दर्शन पार्क, औंध) अशी अटक केलेल्यांची नावे आहेत. याबाबत एका तरुणाने चतु:शृंगी पोलिस ठाण्यात फिर्याद दिली होती. तक्रारदार तरुण आणि त्याचे मित्र औंधमधील विधाते वस्ती भागात २८ जूनला गप्पा मारत थांबले होते. आरोपी आणि फिर्यादी तरुणाचा किरकोळ कारणावरून वाद झाला होता. आरोपी आणि त्यांच्याबरोबर असलेले साथीदार विधाते वस्ती परिसरात आले. तरुण, तसेच त्याच्याबरोबर असलेल्या मित्रांना शिवीगाळ केली. दांडके आणि कोयते उगारून परिसरात दहशत माजविली.
तरुण आणि त्याच्याबरोबर असलेल्या मित्रावर कोयत्याने वार करून आरोपी पसार झाले होते. त्यानंतर पोलिसांनी सापळा लावून आरोपींना ताब्यात घेतले. वरिष्ठ पोलिस निरीक्षक उल्हास कदम, गुन्हे शाखेच्या निरीक्षक अश्विनी ननावरे, सहायक निरीक्षक नरेंद्र पाटील, पोलिस कर्मचारी श्रीकांत वाघवले, इरफान मोमीन, बाबासाहेब दांगडे, बाबूलाल तांदळे, श्रीधर शिर्के आणि महेंद्र वायकर यांनी ही कामगिरी केली.