पुणे, ता. ६ : मिळकतकरातील सवलत मिळविण्यासाठी महापालिकेने दिलेली वाढीव मुदत उद्या (ता. ७) संपुष्टात येत आहे. दरम्यान, आतापर्यंत सात लाखांहून अधिक मिळकतधारकांनी एक हजार ३७५ कोटी रुपयांहून अधिक मिळकतकराचा भरणा केला असल्याचे समोर आले आहे. मुदतीत कर न भरल्यास नागरिकांना सवलतीचा लाभ मिळणार नसल्याचे महापालिकेकडून सांगण्यात आले.
नागरिकांनी मिळकतकर वेळेत भरावा यासाठी ३० जूनपर्यंत महापालिकेने मुदत देऊ केली होती. मिळकतकराचा भरणा करणाऱ्यांना पाच ते दहा टक्के सवलत जाहीर केली आहे. ही मुदत संपत येत असलेल्या दिवशी मिळकतकर भरण्यासाठी सकाळपासून नागरिकांचे प्रयत्न सुरू होते. ऑनलाइन पद्धतीने कर भरण्याचा अनेकांनी प्रयत्न केला. मात्र महापालिकेच्या सर्व्हरवर ताण आल्याने अनेक अडचणी येत होत्या. त्यामुळे दोन ते अडीच तास प्रयत्न करूनही नागरिकांना पैसे भरता येत नव्हते. त्यामुळे महापालिकेच्या नागरी सुविधा केंद्रांसह क्षेत्रीय कार्यालयात असलेल्या कर भरणा केंद्रावर नागरिकांनी गर्दी केली होती. त्यामुळे महापालिकेच्या सर्व्हरवर ताण वाढल्याने मिळकतकर भरण्यास अडचणी निर्माण झाल्या. नागरिकांना झालेला त्रास लक्षात घेत सात जुलैपर्यंत सवलतीमध्ये मिळकतकर भरण्यास महापालिकेने मुदतवाढ देण्याचा निर्णय घेतला होता. त्यानुसार ही मुदत सोमवारी सात जुलै रोजी संपुष्टात येणार आहे. आतापर्यंत सवलतीचा सुमारे ७ लाख १४ हजार मिळकतधारकांनी फायदा घेतला आहे.

महापालिकेचा मिळकतकर भरण्यास येणाऱ्या अडचणी लक्षात घेत सवलतीमध्ये मिळकतकर भरण्यासाठी सात दिवसांची मुदतवाढ देण्यात आली आहे. ती मुदत सोमवारी, सात जुलै रोजी संपुष्टात येत आहे. त्यामुळे ऑनलाइनसह महापालिकेच्या नागरी सुविधा केंद्रात मिळकतकर भरण्याची सुविधा उपलब्ध करून देण्यात आली असून, नागरिकांनी मुदतीत मिळकतकर भरून महापालिकेला सहकार्य करावे.
- अविनाश सकपाळ, उपायुक्त, मिळकतकर विभाग, पुणे महापालिका