पुणे, ता. ६ : घाट विभागात गेल्या काही दिवसांपासून मुसळधार पाऊस सुरू आहे. पुढील दोन ते तीन दिवसांत पावसाचा जोर आणखी वाढणार असल्याने घाट विभागात अतिमुसळधार पावसाची शक्यता भारतीय हवामानशास्त्र विभागाने वर्तविली आहे. त्यामुळे पुणे जिल्ह्यातील घाट विभागाला सोमवारी (ता. ७) ‘रेड’ अलर्ट’ देण्यात आला आहे.
रविवारी (ता. ५) पहाटे पुणे शहराच्या मध्यवर्ती भागासह उपनगरांत हलक्या स्वरूपाच्या पावसाने हजेरी लावली. त्यामुळे वातावरणात काही काळ गारवा निर्माण झाला. मात्र काही वेळ सुरू असलेल्या पावसाने नंतर दिवसभर विश्रांती घेतली. दिवसभर ढगाळ वातावरण होते. मात्र रात्री साडेआठ वाजताच्या सुमारास पावसाने जोरदार हजेरी लावली. त्यामुळे कमाल तापमानातदेखील किंचित घट नोंदविण्यात आली. शहरात कमाल तापमान २७ अंश सेल्सिअस इतके, तर किमान तापमान २२.७ अंश सेल्सिअसइतके नोंदविण्यात आले.
शहरात अचानक सुरू झालेल्या पावसाने नागरिकांची मात्र तारांबळ उडाली, तर शहरातील अनेक रस्ते जलमय झाले होते. अनेक ठिकाणी गटारींची झाकणे कचऱ्याने बंद झाल्यामुळे पाण्याचा निचरा होऊ शकला नाही, परिणामी रस्त्यांवर मोठ्या प्रमाणात पाणी साचले. यामुळे वाहनचालकांची, विशेषतः दुचाकीस्वारांची मोठी गैरसोय झाली. या पावसामुळे शहरातील वाहतूक व्यवस्थेवरही मोठा परिणाम झाला. कोथरूड, चांदणी चौक, सिंहगड रस्ता, स्वारगेट, डेक्कन, कात्रज, फर्ग्युसन रस्ता, जंगली महाराज रस्ता, दांडेकर पूल, राजाराम पूल, कर्वे रस्ता, फातिमानगर, वैदूवाडी, हडपसर, मगरपट्टा, फुरसुंगी या भागांत वाहनांच्या लांबच लांब रांगा लागल्या होत्या. अनेक ठिकाणी नागरिक दीर्घकाळ वाहतूक कोंडीत अडकले, ज्यामुळे त्यांना मानसिक त्रास सहन करावा लागला.
पुणे जिल्ह्याच्या घाट विभागात पुढील दोन दिवसांत पावसाचा जोर अधिक वाढणार असून, तुरळक ठिकाणी अत्यंत जोरदार पाऊस पडण्याची शक्यता आहे. तर पुणे शहर आणि परिसरात पुढील दोन ते तीन दिवसांत कमाल तापमान स्थिर राहणार असून, हलक्या ते मध्यम स्वरूपाच्या पावसाची शक्यता हवामानशास्त्र विभागाने वर्तविली आहे.

असा आहे पावसाचा अंदाज
पुणे आणि परिसरात सोमवारी (ता. ७) कमाल तापमान स्थिर राहणार असून, कमाल तापमानात किंचित वाढ होणार आहे. ते २८ अंश सेल्सिअस इतके, तर किमान तापमान २२ अंश सेल्सिअस नोंदविण्यात येणार आहे. आकाश अंशतः ढगाळ राहणार असून, हलका ते मध्यम स्वरूपाचा पाऊस पडण्याची शक्यता आहे. मंगळवारपासून (ता. ८) पुढील दोन दिवस कमाल तापमानात किंचित वाढ होणार असल्याची शक्यता आहे. कमाल तापमान २९ अंश सेल्सिअसपर्यंत नोंदविण्यात येणार आहे. आकाश अंशतः ढगाळ राहून हलक्या ते मध्यम स्वरूपाचा पाऊस पडण्याची शक्यता हवामानशास्त्र विभागाने वर्तविली आहे.