पुणे, ता. ९ : भोर, वेल्हा, मावळसह जिल्ह्यात भात लावणी व पेरणीची लगबग सुरू असताना ‘आर्यन्स वर्ल्ड स्कूल’च्या ‘शेतकरी मित्र सेनेचे’ स्वयंसेवक पुन्हा एकदा शेतकऱ्यांच्या मदतीसाठी सज्ज झाले आहेत. आर्यन्स शेतकरी मित्र सेनेने फक्त चार दिवसांत ४२ एकर शेतात भातलावणी पूर्ण करून विक्रम केला होता. यंदाही या मुलांनी दिवसभर शेतात भात लावणीसाठी मदत करण्याचा निर्धार केला आहे.
विनामोबदला, विनाअपेक्षा काम करण्यास ही सेना तयार आहे. सर्व विद्यार्थी जेवणाचे डबे घेऊन येणार आहेत. पण जमलं तर मुलांना ग्रामीण झुणका-भाकरी, भात-कालवण याचा आस्वाद दिला तर त्यांना आनंद होईल. मुलांना शेतात नेण्याची व परत शहरात आणण्याची सोय विनामोबदला आर्यन्स वर्ल्ड स्कूल करणार आहे. या उपक्रमामुळे विद्यार्थ्यांना शेतकऱ्यांचे कष्ट, ग्रामीण जीवनशैली व परिस्थिती यांचा प्रत्यक्ष अनुभव घेता येणार आहे. ज्या शेतकऱ्यांना भात लावणीसाठी हे स्वयंसेवक हवे आहेत, त्यांनी शाळेत संपर्क साधावा, असे आवाहन शाळेकडून करण्यात आले आहे.