पुणे, ता. ९ : पुणे व खडकी कॅंटोन्मेंटच्या हद्दीतील नागरी परिसर महापालिकेत विलीनीकरणाबाबत मुख्यमंत्री देवेंद्र फडणवीस यांच्या उपस्थितीत गुरुवारी (ता.१०) मुंबईत बैठक होणार आहे.
पुणे, खडकी कॅंटोन्मेंटसह राज्यातील अन्य कॅंटोन्मेंट बोर्डाच्या हद्दीतील नागरी परिसर संबंधित कॅंटोन्मेंटजवळील स्थानिक स्वराज्य संस्थेत विलीनीकरण करण्यासंदर्भात चार वर्षांपासून चर्चा सुरू आहे. गेल्यावर्षी राज्य सरकारने महापालिका प्रशासनाला यासंदर्भात कॅंटोन्मेंट प्रशासनासमवेत बैठक घेऊन अहवाल सादर करण्यास सांगितला होता. त्यानुसार, महापालिकेने डिसेंबर महिन्यात पुणे व खडकी कॅंटोन्मेंट बोर्डाच्या मुख्य कार्यकारी अधिकाऱ्यांसमवेत लष्कराच्या दक्षिण मुख्यालयात बैठक घेऊन लोकसंख्या, मिळकती, कर्मचारी, त्यांचे वेतन, निवृत्तिवेतन यांसह आर्थिक बाबींवर चर्चा केली होती. महापालिकेने यासंदर्भात आपली भूमिका राज्य सरकारला अहवालाद्वारे कळविलेली आहे.
आजच्या बैठकीत महापालिका आयुक्त नवल किशोर राम, अतिरिक्त आयुक्त ओमप्रकाश दिवटे यांच्यासह वरिष्ठ अधिकारी सहभागी होणार आहेत. महापालिका निवडणुकीच्या तोंडावर विलीनीकरणाची घोषणा झाल्यास प्रभाग रचनेतही बदल होण्याची शक्‍यता आहे.