पुणे, ता. ९ : आषाढी एकादशीनिमित्त देहू-आळंदी ते पंढरपूर व इतर जिल्ह्यांतून आलेल्या नऊ लाखांपेक्षा अधिक वारकऱ्यांची आरोग्य विभागाने ‘भक्ती विठोबाची, सेवा आरोग्याची’ या उपक्रमांतर्गत विनामूल्य आरोग्य तपासणी करून आरोग्यसेवा दिली. परतीच्या मार्गावरही आरोग्यसेवा देण्यात आली.
दिंड्यांमध्ये सहभागी झालेल्या लाखो वारकऱ्यांना रस्त्यात काही त्रास जाणवला की लगेच उपचार मिळावेत, यासाठी आरोग्यसेवा पुरविण्यात आली. संत ज्ञानेश्वर महाराज व संत तुकाराम महाराज पालखीदरम्यान वारकऱ्यांना प्रतिबंधात्मक, उपचारात्मक आरोग्यसेवा देण्यात आली. चित्ररथांच्या माध्यमातून आरोग्य शिक्षण व जनजागृतीसाठी नावीन्यपूर्ण व कल्पक पद्धतीने विविध उपक्रम राबविण्यात आले.

आरोग्यसेवेची वैशिष्ट्ये...
- पालखी सोहळा २०२५ साठी मनुष्यबळ : ४,३७६
- प्रत्येक ५ किमी अंतरावर ‘आपला दवाखाना’ : २०३
- वारीदरम्यान १०२ व १०८ रुग्णवाहिका उपलब्ध : ३३१
- महिला वारकऱ्यांसाठी रुग्णालयांत कार्यरत स्त्रीरोग तज्ज्ञ : १५
- पालखी मुक्कामाच्या ठिकाणी हिरकणी कक्ष : ३७