पुणे, ता. ९ : आई-वडिलांशी झालेल्या किरकोळ वादातून घर सोडून निघालेली हिंगोली जिल्ह्यातील १६ वर्षीय मुलगी पुण्यात आढळून आली. पोलिसांच्या तत्परतेमुळे या मुलीला नातेवाइकांच्या ताब्यात सुखरूप देण्यात आले.
फरासखाना हद्दीतील दत्त मंदिराजवळ एक अल्पवयीन मुलगी संशयास्पद फिरताना पोलिस मित्रांच्या लक्षात आली. याबाबतची माहिती तत्काळ वरिष्ठ पोलिस निरीक्षक प्रशांत भस्मे यांना देण्यात आली. पोलिस उपनिरीक्षक अरविंद शिंदे, अंमलदार गजानन सोनुने, रेखा राऊत, सारिका गुंजाळ आदींनी तपास करत मुलीला विश्वासात घेतले. वारंगा फाटा (ता. कळमनुरी, जि. हिंगोली) येथील ती मुलगी असून किरकोळ वादातून ती घरातून निघून आल्याची माहिती चौकशीतून समोर आली. फरासखाना पोलिसांनी तत्काळ हिंगोली जिल्ह्यातील आखाडा पोलिस ठाण्याशी संपर्क साधला. ही मुलगी हरविल्याबाबत गुन्हा दाखल असल्याचे निष्पन्न झाले. तपास अधिकाऱ्यांशी समन्वय साधून मुलीला तिचे आई-वडील आणि स्थानिक पोलिसांच्या ताब्यात देण्यात आले.
या शोध मोहिमेत पोलिस निरीक्षक अजित जाधव, सहाय्यक निरीक्षक उत्तम नामवाडे, वैभव गायकवाड, अनिता साबळे, मनिषा पुकाळे, अर्चना ढवळे, सोनाली भालेराव, तसेच पोलिसमित्र तेजश्री कुपरे, प्रसाद बनसोडे व कार्तिक घोडेकर यांचे योगदान लाभले.