पुणे, ता. १० : महाराष्ट्र एज्युकेशन सोसायटीच्या रेणुका स्वरूप प्रशालेतर्फे आयोजित कार्यक्रमात दहावी व बारावीतील गुणवंत विद्यार्थिनींचा सन्मान करण्यात आला. या वेळी कार्यक्रमाच्या प्रमुख पाहुण्या म्हणून एवरेस्ट इंग्लिश स्कूलच्या व्यवस्थापकीय संचालिका डॉ. ज्योती टेकाळे, तर अध्यक्षस्थानी सोसायटीचे आजीव सदस्य डॉ. राजीव हाजिरनीस व डॉ. मानसी भाटे उपस्थित होत्या. डॉ. टेकाळे म्हणाल्या, ‘‘आयुष्यात कोणालाही दोष न देता प्रत्येक क्षणाचा स्वीकार करून आपले स्थान निर्माण करा.’’ मुख्याध्यापिका शुभांगी कांबळे यांनी प्रास्ताविक केले. उपमुख्याध्यापिका सुनीता गायकवाड यांनी आभार मानले.

चोक्सी हायस्कूलमध्ये
गुरुपौर्णिमा उत्साहात
पुणे, ता. १० : एस. एम. चोक्सी हायस्कूलमध्ये गुरुपौर्णिमा उत्साहात साजरी करण्यात आली. प्राचार्या डॉ. तंझिला मेमन व भाग्यश्री दिघे यांच्या हस्ते दीपप्रज्वलन व व्यासपूजन झाले. विद्यार्थिनींनी ‘गुरूने दिला ज्ञानरूपी वसा, आम्ही चालवू हा पुढे वारसा’ या गीताचे गायन केले. त्यानंतर ‘गुरुंचे जीवनातील स्थान’ या विषयावर विद्यार्थ्यांनी मराठी, इंग्रजी, हिंदी व गुजराती भाषेमध्ये कथा सांगितल्या. ललिता नातू, योगेश मोकळे व रश्मी गांधी यांनी कार्यक्रमासाठी सहकार्य केले.