विविध कार्यक्रमांद्वारे ‘गुरुपौर्णिमा’ उत्साहात
पुणे, ता. १० : शिवाजीनगर येथील पी. ई. एस. मॉडर्न प्रायमरी इंग्लिश मीडियम स्कूलमध्ये विविध कार्यक्रमांद्वारे ‘गुरुपौर्णिमा’ उत्साहात साजरा करण्यात आली. मुख्याध्यापिका माधवी देशपांडे यांच्या हस्ते महर्षी वेद व्यासाच्या प्रतिमेचे पूजन झाले. चौथीच्या विद्यार्थ्यांनी ‘खरा शिष्य’ ही नाटिका सादर केली. गुरुभक्तीपर कथा सांगितल्या. तसेच सवाई गंधर्व भीमसेन जोशी, सचिन तेंडुलकर, रमाकांत आचरेकर अशा गुरुशिष्यांच्या जोड्या वेशभूषेसह संवादातून सादर केल्या. विद्यार्थ्यांनी जीवनातील पहिला गुरू ‘आई’ ला शाळेत रंगविलेले शुभेच्छा पत्र देऊन नमस्कार केला. संगीत शिक्षिका अश्‍विनी सोमण यांनी कार्यक्रमाचे नियोजन केले. सर्व शिक्षकांच्या सहकार्याने कार्यक्रम झाला.

राजश्री शेठ यांची अध्यक्षपदी नियुक्ती
पुणे, ता. १० : लायन्स क्लब ऑफ पुणे, विजयनगरच्या अध्यक्षपदी राजश्री शेठ यांची नियुक्ती करण्यात आली. ही नियुक्ती २०२५-२६ या वर्षासाठी झाली आहे. माजी अध्यक्ष विपिन शेठ यांच्या कडून राजश्री शेठ यांनी सूत्रे स्वीकारली. क्लबच्या सचिवपदी मिताली गुजर, खजिनदारपदी रुचा शेठ यांची नियुक्ती करण्यात आली. प्रांतपाल राजेश आगरवाल यांनी सर्वांना जबाबदारी सांगून शपथ प्रदान केली. यावेळी उपप्रांतपाल श्रेयस दीक्षित, राजेंद्र गोयल, माजी प्रांतपाल चंद्रशेखर शेठ, अरुण शेठ उपस्थित होते.

रोटरी क्लब पुणे साऊथच्या अध्यक्षपदी अॅड. बेळगावकर
पुणे, ता. १० : रोटरी क्लब पुणे साऊथच्या अध्यक्षपदी अॅड. मनीषा बेळगावकर तर सचिवपदी संदीप आवधानी यांची नियुक्ती करण्यात आली. ही नियुक्ती २०२५-२६ या वर्षासाठी झाली आहे. डॉ. मंदार अंबिके यांच्याकडून बेळगावकर यांनी अध्यक्षपदाची सूत्रे स्वीकारली. याप्रसंगी प्रमुख पाहुणे माजी प्रांतपाल रश्मी कुलकर्णी तसेच राजेश दुब्बेवार, सहाय्यक प्रांतपाल संजीव करंजकर उपस्थित होते.