पुणे, ता. ११ ः बालगंधर्व संगीत रसिक मंडळातर्फे दिला जाणारा ‘बालगंधर्व गुणगौरव पुरस्कार’ यंदा गायिका मंजूषा कुलकर्णी-पाटील यांना जाहीर झाला आहे, तसेच ‘कोहिनूर गंधर्व पुरस्कार’ गायक कैवल्यकुमार गुरव यांना जाहीर झाला आहे.
मंडळाचे अध्यक्ष सुरेश साखवळकर आणि कार्याध्यक्ष नाना कुलकर्णी यांनी ही माहिती दिला. एक लाख ११ हजार रुपये, असे बालगंधर्व गुणगौरव पुरस्काराचे; तर ५१ हजार रुपये, असे ‘कोहिनूर गंधर्व पुरस्कारा’चे स्वरूप आहे. मंगळवारी (ता. १५) सायंकाळी पाच वाजता बालगंधर्व रंगमंदिरात होणाऱ्या कार्यक्रमात माजी केंद्रीय रेल्वेमंत्री सुरेश प्रभू, खासदार डॉ. मेधा कुलकर्णी आणि ज्येष्ठ गायक पं. उल्हास कशाळकर यांच्या उपस्थितीत पुरस्कारांचे वितरण होणार आहे. या वेळी नाटककार अभिराम भडकमकर यांना ‘अण्णासाहेब किर्लोस्कर पुरस्कार’, अजय पराड यांना ‘भास्करबुवा बखले पुरस्कार’, आशुतोष नेर्लेकर यांना ‘गो. ब. देवल पुरस्कार’, डॉ. मंगला आपटे यांना ‘काकासाहेब खाडिलकर पुरस्कार’, रोहिदास परब यांना ‘डॉ. सावळो केणी पुरस्कार’ आणि हर्शल काटदरे यांना ‘खाऊवाले पाटणकर पुरस्कारा’ने सन्मानित केले जाणार आहे. पुरस्कार वितरण सोहळ्यानंतर ‘गंधर्वांजली’ ही नाट्य संगीताची मैफील होणार आहे. हा कार्यक्रम सर्वांसाठी खुला आहे; मात्र प्रवेशिका आवश्यक आहेत.