सकाळ वृत्तसेवा
पुणे, ता. ११ : हद्दीतील नव्वद पैकी विविध प्रकारच्या चाळीस पुलांच्या बांधकामाचे स्ट्रक्चर ऑडिट पुणे महापालिकेकडून पूर्ण करण्यात आले आहे. त्यापैकी ३८ पुलांची दुरुस्तीची आवश्‍यकता असून ते काम सुरू करण्यात आले आहे. आतापर्यंत सत्तर टक्के काम पूर्ण झाले आहे. तर शहरातील होर्डिंगचेदेखील स्ट्रक्चरल ऑडिट करण्यात आले असून आकाशचिन्ह विभागाकडे अधिकृत मान्यता असलेल्या २ हजार ६४० होर्डिंग तपासणीत सुस्थितीत आढळले आहेत.
पुणे महापालिकेनेही शहरातील सर्व पूल व भुयारी मार्गांचे ऑडिट केल्याचा अहवाल जिल्हा प्रशासनाला सदर केला आहे. मावळ तालुक्यातील कुंडमळा येथील दुर्घटनेच्या पार्श्वभूमीवर जिल्ह्यातील पूल, साकव, जाहिरात फलक तसेच उड्डाण पुलांच्या स्ट्रक्चरल ऑडिटचे आदेश जिल्हाधिकाऱ्यांनी दिले आहेत. त्यानुसार महापालिकेने सादर केलेल्या अहवालातून ही माहिती समोर आली आहे.
शहरात एकूण ९० बांधकामांपैकी ४० बांधकामांचे स्ट्रक्चरल ऑडिट करण्यात आले असून त्यातील एक धोकादायक रेल्वे उड्डाण पूल आणि एक कॉजवे यापूर्वीच पाडण्यात आले आहेत. मात्र, या ३८ बांधकामांची दुरुस्ती करावी लागणार असून त्याचे ७० टक्के काम झाल्याचे अहवालात नमूद करण्यात आले आहे.
कुंडमळा येथील दुर्घटनेनंतर डुडी यांनी जिल्ह्यातील धोकादायक ठिकाणांचा बांधकाम तपासणी अहवाल सात दिवसांत सादर करण्यासाठी सर्व संबंधित यंत्रणांना आदेश दिला होता. त्यानंतर सार्वजनिक बांधकाम विभाग, राष्ट्रीय महामार्ग प्राधिकरण, जिल्हा परिषद, रेल्वे, जलसंपदा, राज्य रस्ते विकास महामंडळ तसेच ‘पीएमआरडीए’ या विभागांकडून अहवाल प्राप्त झाला होता. तर पुणे व पिंपरी चिंचवड महापालिकेचा अहवाल मिळालेला नव्हता. हा अहवाल दोन दिवसांपूर्वी जिल्हा प्रशासनाला प्राप्त झाला आहे.

महत्त्वाचे
- पुणे महापालिकेच्या हद्दीतील नदीवरील पूल, उड्डाण पूल, रेल्वे उड्डाण पूल, पादचारी भुयारी मार्ग, भुयारी वाहन मार्ग, पादचारी उड्डाण पूल, कॉजवे अशी एकूण ९० बांधकामे आहेत
- यातील नदीवरील पूल, उड्डाण पूल, रेल्वे उड्डाण पूल अशा एकूण ६१ बांधकामांची पाहणी करून त्यातील २५ वर्षांपेक्षा जुन्या असलेल्या ३८ बांधकामांची तपासणी केली
- त्यांची दुरुस्ती करावी लागणार
- यातील प्राधान्य क्रमवारीच्या ११ पुलांच्या दुरुस्तीची कामे प्रकल्प विभागाकडून करण्याचे नियोजन
- ही कामे ७० टक्क्यांपर्यंत पूर्ण करण्यात आली आहेत
- या सर्व बांधकामांचे स्ट्रक्चरल ऑडिट करण्यासाठी तज्ज्ञ सल्लागार नेमण्यात येणार असून त्याची निविदा प्रक्रिया सुरू
- यासाठी अंदाज पत्रकात १० कोटी रुपयांची तरतूद
- पुणे शहरात एक रेल्वे उड्डाण पूल व एक कॉजवे धोकादायक आढळला होता
- यापूर्वी साधू वासवानी रेल्वे उड्डाण पूल आणि वृद्धेश्वर येथील नदीवरील कॉजवे धोकादायक स्थितीत असल्याने ते पाडण्यात आले

आकडे बोलतात
बांधकामाचा प्रकार--संख्या--ऑडिटची संख्या--दुरुस्ती करण्यायोग्य संख्या
नदीवरील पूल--३२-- २६--२६
उड्डाण पूल २०--१०--१०
रेल्वे उड्डाण पूल ९--३--२
पादचारी भुयारी मार्ग १८--०--०
वाहन भुयारी मार्ग ९--०--०
पादचारी उड्डाण पूल १०--०--०
कॉजवे १--१--०
एकूण ९०--४०--३८