पुणे, ता. ११ ः ‘पीएमपी’ प्रशासनाने प्रवाशांच्या सोयीसाठी आपल्या मार्गांचा विस्तार करण्याचे ठरविले आहे. सध्या ४०२ मार्गांवर ‘पीएमपी’ बस धावत असून, त्याद्वारे सुमारे ११ लाख प्रवाशांची दैनंदिन वाहतूक होत आहे. शहर व उपनगरातील प्रवाशांची गरज लक्षात घेता ‘पीएमपी’ प्रशासनाने आपल्या मार्गाच्या संख्येत वाढ करण्याचा निर्णय घेतला आहे. वाहतूक विभागाने केलेल्या सर्वेनुसार १५ नवे मार्ग अस्तित्वात येत असून, आठवड्यात या नवीन मार्गांवर सेवा सुरू होणार आहे.
गेल्या काही महिन्यांत ‘पीएमपी’ प्रशासनाला आलेली मरगळ आता दूर होताना दिसून येत आहे. ‘पीएमपी’चे अध्यक्ष दीपा मुधोळ मुंडे यांनी मागच्या आठवड्यात कामचुकार कर्मचाऱ्यांवर कारवाईचा बडगा उगारल्यानंतर ‘पीएमपी’ प्रशासन आता पुन्हा सक्रिय होताना दिसून येत आहे. २५ कर्मचाऱ्यांचे निलंबन केल्यानंतर आता विभाग प्रमुखांना ‘बाहेरचा रस्ता’ दाखवीत त्यांना आगाराचे पालक अधिकारी तर नेमलेच, शिवाय त्यांना बसमधून प्रवास करण्याचीदेखील सक्ती करण्यात आली आहे. त्यामुळे प्रवाशांची संवाद साधत नव्या मार्गांची आखणी केली जात आहे.
बसची संख्या मर्यादित असताना मार्गात वाढ केली जात आहे. त्यामुळे कमी प्रतिसाद असणारे मार्ग काही प्रमाणात रद्द होण्याची शक्यता वर्तवली जात आहे.
दर बुधवारी अधिकारी बसमध्ये
‘पीएमपी’चे सर्व वरिष्ठ अधिकारी, विभाग प्रमुख यांना आठवड्यातून एक दिवस बसमधून प्रवास करण्याचा आदेश अध्यक्षांनी दिला आहे. त्यानुसार दर बुधवारी अधिकारी विविध मार्गांवर प्रवास करून प्रवाशांशी संवाद साधत आहेत. त्यांच्या अडचणी, सूचना यांचा अभ्यास सुरू आहे. त्यांनी काही मार्गदेखील प्रशासनाला सुचविलेले आहे. प्रवाशांनी सुचविलेल्या मार्गांबाबत ‘पीएमपी’ प्रशासनाने सर्वेक्षण केले असून त्यापैकी १५ नवीन मार्ग सुरू करण्याचा निर्णय झाला आहे.
कोंडी व पावसामुळे लेटमार्क
वाहतूक कोंडी व पावसामुळे ‘पीएमपी’च्या वाहतुकीला फटका बसत आहे. शिवाय बस बंद पडण्याचे प्रमाणदेखील वाढले आहे. या सर्वांचा फटका प्रवाशांना बसत आहे. सकाळच्या सत्रात वाहतूक सुरळीत असते. मात्र दुपारच्या सत्रात वाहतुकीचे नियोजन विस्कळित होते.
वाहतूक कोंडी व पावसामुळे ‘पीएमपी’च्या फेऱ्यांना सुमारे दीड ते दोन तास उशीर होत असल्याचे ‘पीएमपी’ प्रशासनाचे म्हणणे आहे. बस मार्गांची संख्या वाढविण्याबाबत सर्वेक्षण सुरू आहे. सुमारे १५ मार्ग वाढविले जाऊ शकतात. यामुळे प्रवाशांची सोय होणार आहे. - नितीन नार्वेकर, सहव्यवस्थापकीय संचालक, पीएमपीएमएल, पुणे
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.