पुणे, ता. ११ : भारती विद्यापीठ पोलिसांनी सरहद चौकाकडून वंडरसिटीकडे जाणाऱ्या रस्त्यावर एका तरुणाकडून गावठी कट्टा जप्त केला. निखिल सचिन यादव (वय २४, रा. धनकवडी) या सराईत गुन्हेगाराला पोलिसांनी अटक केली.

वरिष्ठ निरीक्षक राहुल खिलारे यांच्या सूचनेनुसार पोलिस उपनिरीक्षक नीलेश मोकाशी, पोलिस अंमलदार मितेश चोरमोले, सागर बोरगे आणि अभिनय चौधरी हे गस्त घालत होते. त्या वेळी नारायणी धाम मंदिराच्या मागील बाजूस पदपथावर एक तरुण गावठी कट्ट्यासह थांबल्याची माहिती त्यांना मिळाली. पोलिसांनी घटनास्थळी धाव घेत तरुणाला ताब्यात घेतले. त्याची झडती घेतली असता त्याच्याजवळ ५० हजार रुपये किमतीचा गावठी कट्टा आढळून आला. त्याच्यावर शस्त्र अधिनियमाखाली गुन्हा दाखल करण्यात आला आहे. त्याने हा कट्टा कोणत्या उद्देशाने बाळगला होता, याचा तपास सुरू आहे.