पुणे, ता. १२ : पानटपरीवरील वादातून तरुणावर कोयत्याने वार करून खून करण्यात आल्याची घटना कात्रज परिसरात घडली. शुक्रवारी रात्री साडेदहाच्या सुमारास साईसिद्धी चौकात ही घटना घडली. या प्रकरणी भारती विद्यापीठ पोलिसांनी एकाला अटक केली आहे.
आर्यन साळवे (वय २५, रा. सटाणा, नाशिक) असे खून झालेल्या तरुणाचे नाव आहे. या प्रकरणी धैर्यशील मोरे (वय ३०, रा. साईसिद्धी चौक) याला अटक केली आहे. आर्यन हा मूळचा नाशिकमधील सटाण्यातील आहे. त्याचे मामा आंबेगाव पठार परिसरात राहायला आहेत. १५ दिवसांपूर्वी तो मामांकडे राहण्यासाठी आला होता. तो एका केशकर्तनालयात काम करत होता. शुक्रवारी रात्री तो पानटपरी पान खाण्यासाठी गेला. त्या वेळी धैर्यशील मोरे तेथे सिगारेट ओढत होता. धैर्यशीलने आर्यनकडे पाहिले. या कारणावरून त्यांच्यात वाद झाला. त्यातून धैर्यशीलने कोयत्याने आर्यनवर वार केले. आर्यनने कोयत्याचा वार हातावर झेलला. त्यामुळे त्याची बोटे तुटली. त्यानंतर धैर्यशीलने त्याच्या डोक्यावर कोयत्याने वार केला. या घटनेत आर्यन गंभीर जखमी झाला. त्यानंतर त्याला नागरिकांनी तातडीने रुग्णालयात दाखल केले. मात्र उपचारांपूर्वीच त्याचा मृत्यू झाला, अशी माहिती भारती विद्यापीठ ठाण्यातील गुन्हे शाखेचे पोलिस निरीक्षक राहुलकुमार खिलारे यांनी दिली. पोलिसांनी धैर्यशीलला अटक केली असून, उपनिरीक्षक प्रियांका निकम तपास करत आहेत.