पुणे, ता. १२ : धक्का लागल्याच्या वादातून टोळक्याने एकाला दांडक्याने बेदम मारहाण करून त्याचा खून केल्याची धक्कादायक घटना उरुळी देवाची परिसरात गुरुवारी घडली. या प्रकरणी फुरसुंगी पोलिसांनी सहा जणांना अटक केली आहे.
रामलोचन हुसैनी कोरी (वय ४६, रा. उत्तरप्रदेश) असे खून झालेल्याचे नाव आहे. टोळक्याने केलेल्या मारहाणीत धीरज राम (वय २५) व संतकुमार कोरी (वय २५, रा. उरुळी देवाची, फुरसुंगी) हे जखमी झाले आहेत. या प्रकरणी प्रेमलाल सुरतनाम कुमरे (वय २१), देवेस वसंत धुर्वे (वय २२), संजय पुल्स मसराम (वय २८), रणजित प्रकाश जाधव (वय २०), सतीश भरत कुमरे (वय १८) आणि विशाल मनाजी सरियाम (वय १८) यांना अटक केली आहे. याबाबत संतकुमार कोरी यांनी फिर्याद दिली आहे.
पोलिसांनी दिलेल्या माहितीनुसार, संतकुमार आणि रामलोचन हे मामा-भाचे आहेत. रामलोचन, संतकुमार, धीरज हे मूळचे उत्तरप्रदेशातील आहेत. तर आरोपी हे मध्य प्रदेशातील आहेत. ते उरुळी कांचन परिसरातील गोदामात हमाली करतात. गुरुवारी रात्री साडेनऊच्या सुमारास रामलोचन हे वेफर्स आणण्यासाठी दुकानात गेले होते. तेव्हा आरोपीमधील एकाला त्यांचा धक्का लागला. या कारणावरून त्यांच्यात वाद झाला. वादानंतर आरोपींनी रामलोचन यांना दांडक्याने बेदम मारहाण केली. त्यानंतर आरोपी संतकुमार राहत असलेल्या खोलीत शिरले. आरोपींनी संतकुमार आणि धीरज यांना दांडक्याने बेदम मारहाण केली. मारहाणीत रामलोचन यांच्या डोक्याला गंभीर मार लागल्याने त्यांचा मृत्यू झाला.
या घटनेची माहिती मिळताच परिमंडळ पाचचे पोलिस उपायुक्त डॉ. राजकुमार शिंदे, सहायक आयुक्त अनुराधा उदमले यांनी घटनास्थळी भेट दिली. गुन्हे शाखेचे पोलिस निरीक्षक राजेश खांडे तपास करत आहेत.