पुणे, ता. १२ : देशातील खासगी रुग्णालयांच्या साखळीपैकी एक असलेल्या मणिपाल रुग्णालयाने पुण्‍यासह राज्‍यातील ११ सह्याद्री रुग्‍णालये विकत घेण्यासाठी अंतिम करारावर स्वाक्षरी केली आहे. कॅनडाच्या ‘आँटॅरिओ टीचर्स पेन्शन प्‍लॅन’ या गुंतवणूकदार संस्‍थेने सहा हजार ४०० कोटी रुपयांना हा करार केला आहे. त्यामुळे पश्चिम भारतात व विशेषतः पुण्यातील खासगी आरोग्‍य क्षेत्रात मणिपाल रुग्णालय ग्रुपचा प्रभाव वाढला आहे.
अनेक महिन्‍यांपासून सह्याद्री रुग्‍णालयाच्‍या खरेदीबाबत चर्चा सुरू होती. त्‍यासाठी देशातील मणिपालसह अनेक साखळी रुग्‍णालये इच्छुक होती. अखेर मणिपाल रुग्‍णालयाने ‘सह्याद्री’‍चा अधिकृत ताबा घेतल्याची घोषणा केली आहे. सह्याद्री रुग्‍णालयाची राज्‍यात १४०० खाटांची ११ रुग्‍णालये असून, त्‍यापैकी आठ पुण्‍यात तर उर्वरित तीन रुग्‍णालये नाशिक, कराड व अहिल्‍यानगरमध्ये आहेत. त्‍या सर्वांची मालकी आता मणिपाल ग्रुपकडे गेली आहे. या खरेदीमुळे मणिपाल ग्रुपची देशातील रुग्‍णालयांची संख्या ४९ वर, तर एकूण खाटांची संख्या १२ हजारांवर पोहोचणार आहे.
मणिपाल हेल्थ एंटरप्रायझेसचे व्यवस्थापकीय संचालक आणि मुख्य कार्यकारी अधिकारी दिलीप जोसे म्‍हणाले, ‘‘सह्याद्री रुग्‍णालयासारख्या बहू-विशेषज्ञता आणि गुणवत्तापूर्ण सेवांनी सज्ज संस्थेला मणिपाल कुटुंबात सामील करताना आनंद होत आहे.’’ मणिपाल एज्युकेशन अँड मेडिकल ग्रुपचे अध्यक्ष डॉ. रंजन पै म्‍हणाले, ‘‘पश्चिम भारतात आरोग्यसेवेच्या विस्ताराच्या दृष्टीने ही खरेदी महत्त्वाची आहे. १९९१ मध्ये एका रुग्णालयापासून सुरू झालेली मणिपालची वाटचाल आज देशातील सर्वांत मोठ्या रुग्णालय साखळीपैकी एकपर्यंत पोहोचली आहे.’’