पुणे, ता. १२ ः उत्पादन शुल्क विभागाने वित्तीय धोरणात केलेल्या व्हॅट, परवाना शुल्कामधील वाढीचा निषेध करण्यासाठी आज बार व्यावसायिकांनी बंद पुकारला होता. त्याला प्रतिसाद देत शहरातील बहुतांश व्यावसायिकांनी आपला बार बंद ठेवला होता. ‘पुणे रेस्टॉरंट अ‍ॅण्ड हॉटेलियर्स असोसिएशनने पुकारलेल्या ‘बंद’ला शहरातील इतर संघटनांनी पाठिंबा दिला होता.
राज्य उत्पादन शुल्क विभागाने जाहीर केलेल्या वित्तीय धोरणांमध्ये मद्यावरील व्हॅट पाच टक्क्यांवरून १० टक्के करण्यात आला आहे तर परवाना शुल्कात १५ टक्के वाढ करण्यात आली आहे. तसेच, देशी-विदेशी दारूवर उत्पादन शुल्कात तब्बल ६० टक्के वाढ करण्यात आली आहे. या निर्णयाचा राज्यातील १९ हजार तर पुण्यातील चार हजार २०० परवानाधारक बार आणि परमीट रूम चालकांच्या व्यवसायावर परिणाम होणार आहे. पुण्यात सध्या सुरू असलेले बार व परमीट रूमवर तब्बल दोन लाख कर्मचारी व १५ हजार छोटे व्यावसायिक अवलंबून आहेत. या निर्णयाचा फटका त्यांना देखील बसणार आहे. त्यामुळे शासनाने मद्यावरील व्हॅट रद्द करावा आणि उत्पादन शुल्क कमी करावे, अशी मागणी असोसिएशनने केली आहे.
राज्य सरकारने केलेल्या अन्यायकारक करवाढीच्या विरोधात सोमवारी पिंपरी चिंचवड शहरातील सर्व हॉटेल्स परमीट रूम व बिअर बार बंद ठेवून राज्य सरकारचा निषेध करण्यात आला, अशी माहिती पिंपरी चिंचवड हॉटेल ॲण्ड रेस्टॉरंट असोसिएशनचे अध्यक्ष गणेश कुदळे यांनी दिली.

‘‘मद्यावरील व्हॅट रद्द करावा, उत्पादन शुल्क कमी करावे यासह अन्य मागण्यांसाठी राज्यातील परवानाधारक बार आणि परमीट रूम व्यावसायिकांनी आज बंद पाळला. शहरातील हॉटेल व्यावसायिकांसह इतर संघटनांनी ‘बंद’ला पाठिंबा दिला. या मागणीसाठी सातत्याने पाठपुरावा करण्यात येत आहे. सरकार या मागणीचा सकारात्मक दृष्टीने विचार करेल, अशी आमची आशा आहे.
गणेश शेट्टी, अध्यक्ष, पुणे रेस्टॉरंट अ‍ॅण्ड हॉटेलियर्स असोसिएशन

31281
शिवाजीनगर ः व्हॅट, परवाना शुल्कामधील वाढीचा निषेध करण्यासाठी पुकारलेल्या ‘बंद’ला पाठिंबा दर्शवून शहरातील बार सोमवारी बंद ठेवण्यात आले होते.