पुणे, ता. १५ : स्वमग्न तरुण आणि प्रौढ व्यक्तींना सक्षम करण्याच्या उद्देशाने मार्केट यार्डातील बुऱ्हानी कॉलनी येथे सुंदरजी व्होकेशनल इन्स्टिट्यूटची स्थापना करण्यात आली आहे. या संस्थेचे उद्‍घाटन बालविकासतज्ज्ञ डॉ. सुनील गोडबोले आणि डॉ. अश्विनी गोडबोले यांच्या हस्ते झाले. याप्रसंगी सुंदरजी ग्लोबल अकादमीच्या सहसंस्थापक आणि संचालक मसरत तवावाला, डॉ. झिमरा इस्रायल, नीलेश बजाज तसेच ‘रोटरी क्लब ऑफ पूना डाउनटाउन’च्या अध्यक्ष आदिती भेंडे आदी उपस्थित होते.
तवावाला म्हणाल्या, ‘‘स्वमग्न तरुण आणि प्रौढांना आर्थिकदृष्ट्या स्वतःच्या पायावर उभे करणे, हे आमचे उद्दिष्ट आहे. संस्थेत डिजिटल साक्षरता, बेकिंग, हाउसकीपिंग, बागकाम आणि फॅब्रिक एनहान्समेंट अशा पाच व्यावसायिक प्रयोगशाळा असून, त्यांचे तीन वर्षांचे अभ्यासक्रम आहेत.’’ संस्थेच्या प्राचार्या रश्मी शाह यांनी मनोगत व्यक्त केले.