पुणे, ता. १५ : पूर्ववैमनस्यातून गोकुळनगरमध्ये एका तरुणावर कोयते आणि तलवारींनी हल्ला केल्याप्रकरणी कोंढवा पोलिसांनी सात सराईत गुन्हेगारांना अटक केली असून, अन्य दोन अल्पवयीन मुलांना ताब्यात घेतले आहे.
या प्रकरणी कोंढवा पोलिस ठाण्यात गुन्हा दाखल करण्यात आला आहे. राजू ऊर्फ राजा संगप्पा गुळकर (वय १८), तन्वीर अक्रम शेख (वय १९), सुरेंद्र ऊर्फ अमर भुवनेश्वर साव (वय १९), कैलास बाबूराव गायकवाड (वय २२), कविराज ऊर्फ केडी सुदाम देवकाते (वय १९), प्रेम ऊर्फ पप्या यल्लेश घुंगरगी (वय २२), यश ऊर्फ मास अंबर सोनटक्के (वय १८, सर्व जण रा. साईनगर, कोंढवा बुद्रुक) अशी अटक केलेल्यांची नावे आहेत.
पोलिसांनी दिलेल्या माहितीनुसार, फिर्यादी तरुण ११ जुलै रोजी रात्री गोकुळनगर चौकातून एसबीआय कॉर्नरजवळून घरी जाताना त्याच्यावर टोळक्याने कोयते, तलवारींनी हल्ला केला. हल्लेखोरांनी डोक्यात, पाठीवर, कमरेखाली आणि हातांवर वार करत त्याचा जीव घेण्याचा प्रयत्न केला, तसेच तलवारी हवेत भिरकावत नागरिकांमध्ये दहशत पसरवली.
या प्रकरणात वरिष्ठ पोलिस निरीक्षक विनय पाटणकर, पोलिस निरीक्षक नवनाथ जगताप आणि वर्षा देशमुख यांनी पथके तयार करून आरोपींचा शोध घेण्याच्या सूचना दिल्या. तपासादरम्यान आरोपी हे साळवे गार्डनमागील पडीक खोलीत लपून बसल्याची माहिती पोलिस अंमलदार सूरज शुक्ला, अभिजित जाधव, विजय खेंगरे, राहुल शेलार यांना मिळाली. त्यानुसार पोलिस पथकांनी परिसराला वेढा घालून आरोपींना अटक केली. न्यायालयाने आरोपींना १६ जुलैपर्यंत पोलिस कोठडी सुनावण्यात आली आहे. पुढील तपास पोलिस उपनिरीक्षक पंकज खोपडे करीत आहेत.