पुणे, ता. १५ ः जिल्हा परिषद आणि पंचायत समितीचे गट, गण जाहीर करण्यात आलेल्या प्रारूपाचे राज्यातील सत्ताधारी पक्षाने स्वागत केले आहे, तर गट, गण रचनांची मोडतोड करण्यात आल्याचा आरोप विरोधी पक्षांकडून करण्यात आला. इच्छुकांचा गटाची रचना समजून घेण्याकडे कल आहे.
रखडलेल्या स्थानिक स्वराज्य संस्थांच्या निवडणुका घेण्याचे न्यायालयाने आदेश दिल्यानंतर ग्रामविकास विभागाने अधिसूचना काढली. त्यानंतर प्रशासकीय कामाला वेग आला. प्रारूप गट, गण रचनेसाठी २१ जुलैपर्यंत हरकती आणि सूचना नागरिकांना नोंदविता येणार आहेत. मात्र, त्यामध्ये फार मोठा बदल होणार नसल्याचे सांगितले जाते.
विविध पक्षांतील नेते एकमेकांवर आरोप करत असले तरी, इच्छुकांनी मात्र गटांचा अभ्यास करण्यावर लक्ष केंद्रित केले आहे. नव्याने आलेली गावे त्या गावांमधील राजकारण, संबंधित गावांमधील महत्त्वाच्या व्यक्तींपर्यंत पोहोचण्यासाठी आत्तापासूनच इच्छुकांनी भर देण्यास सुरुवात केली आहे. शिरूर तालुक्यातील एका इच्छुकाने सांगितले, अगोदर तयारी करताना पूर्वीच्या गटाचा आधार घेऊन केली होती. परंतु, आता गट अगदी वेगळा तयार झाला आहे. गट कसाही आला तरी मी विजयी होणार असल्याचा ठाम विश्वास व्यक्त केला.

आता आरक्षणावर लक्ष
गट, गण रचनेचे प्रारूप जाहीर झाल्यानंतर इच्छुकांमध्ये आता आरक्षणाच्या संदर्भात चर्चा सुरू झाल्या आहेत. तयारी तर सुरू आहे, पण आरक्षण कोणते पडणार यावर निवडणुकीची गणिते अवलंबून असणार आहेत. तर काही ठिकाणी पती आणि पत्नी अशा दोघांनीही तयारी सुरू ठेवली आहे. जिल्हा परिषदेच्या काही माजी पदाधिकाऱ्यांना यापूर्वीच्या आरक्षण सोडतीमध्ये धक्का बसला होता.

कोण काय म्हणाले?
राष्ट्रवादी काँग्रेस शरदचंद्र पवार पक्षाचे जिल्हाध्यक्ष जगन्नाथ शेवाळे ः जिल्हा परिषद व पंचायत समितीचे गट-गण निश्‍चित करताना निकष पाळले गेले नाहीत. मावळ तालुक्यातील एक गाव नगरपरिषदेच्या हद्दीत गेल्यामुळे तीन गावांचा मतदारसंघ बदलण्यात आला आहे. इंदापूर, दौंड तालुक्यातही असाच प्रकार झाला आहे. याविरोधात आम्ही हरकती नोंदविणार आहोत.

राष्ट्रवादी काँग्रेसचे जिल्हाध्यक्ष प्रदीप गारटकर ः गटांमध्ये काही गावांमध्ये बदल झाला आहे. हवेली तालुक्यातील काही गावे महापालिकेत समाविष्ट झाल्यामुळे हवेलीत बदल झाला आहे. या पार्श्वभूमीवर जिल्ह्यातील सर्व पदाधिकाऱ्यांची बुधवारी बैठक होणार आहे. त्यावेळी या प्रारूप रचनेच्या संदर्भात चर्चा केली जाणार आहे.

शिवसेनेचे जिल्हाप्रमुख रमेश कोंडे ः गट, गण प्रारूप रचना समाधानकारक झाली आहे. रचना सर्वसमावेशक असून, चांगल्या पद्धतीने मतदारसंघ निश्चित करण्यात आले आहेत. पक्षातील सर्व इच्छुक कामाला लागले आहेत.

काँग्रेस समितीचे प्रदेश सरचिटणीस श्रीरंग चव्हाण ः गण, गट झालेली रचना मला सर्वसमावेशक वाटत नाही. सत्ताधाऱ्यांनी सोयीची रचना केली आहे. यामुळे सर्वसामान्य कार्यकर्त्यांना न्याय मिळणार नाही.’’

भाजप ः आम्ही गट, गण रचनेचा अभ्यास करून प्रतिक्रिया देऊ.