‌पुणे, ता. १५ ः संगणकतज्ज्ञ डॉ. दीपक शिकारपूर लिखित आणि विश्‍वास प्रकाशनतर्फे प्रकाशित ‌‘करिअर दिशा.. दहावी-बारावीनंतर‌’ या पुस्तकाचे प्रकाशन सावित्रीबाई फुले पुणे विद्यापीठाचे कुलगुरू डॉ. सुरेश गोसावी यांच्या हस्ते झाले. गणेशखिंड येथील मॉडर्न महाविद्यालयाच्या सभागृहात आयोजित या कार्यक्रमाप्रसंगी प्रोग्रेसिव्ह एज्युकेशन सोसायटीच्या सहकार्यवाह डॉ. ज्योत्स्ना एकबोटे, ज्येष्ठ संशोधक डॉ. अरविंद नातू, सावित्रीबाई फुले पुणे विद्यापीठातील तंत्रज्ञान विभाग प्रमुख डॉ. आदित्य अभ्यंकर, मॉडर्न महाविद्यालयाचे प्राचार्य डॉ. संजय खरात उपस्थित होते. ‘‘आजच्या काळात विद्यार्थ्यांनी दूरदृष्टी ठेवून विविध विषयांत कौशल्यविकास साधणे आवश्यक आहे. त्यासाठी हे पुस्तक अत्यंत उपयुक्त आहे’’, असे मत डॉ. गोसावी यांनी व्यक्त केले. विश्वास प्रकाशनच्या संचालिका वैशाली कार्लेकर यांनी सूत्रसंचालन केले. डॉ. शुभांगी भातांब्रेकर यांनी आभार मानले.