पुणे, ता. १६ : राज्यातील शासकीय, शासकीय अनुदानित, विद्यापीठांशी संलग्न, विद्यापीठातील विभागात बी. फार्म आणि डी. फार्म अभ्यासक्रमाच्या प्रवेशासाठी राबविण्यात येणाऱ्या केंद्रीय प्रवेश प्रक्रियेत ऑनलाइन नोंदणी करण्यासाठी सोमवारपर्यंत (ता. २१) मुदतवाढ देण्यात आली आहे. बी. फार्म आणि डी. फार्म अभ्यासक्रमाच्या प्रवेशासाठी तात्पुरती गुणवत्ता यादी २५ जुलै रोजी आणि अंतिम गुणवत्ता यादी ३१ जुलै रोजी जाहीर होणार आहे.
शैक्षणिक वर्ष २०२५-२६ मध्ये चार वर्षांचे पूर्णवेळ बी. फार्म अभ्यासक्रमाचे प्रथम वर्ष आणि सहा वर्षांच्या पूर्णवेळ डी. फार्म अभ्यासक्रमाच्या प्रथम वर्षाच्या प्रवेशाची प्रक्रिया महाराष्ट्र राज्य सामाईक प्रवेश परीक्षा कक्षामार्फत सुरू करण्यात आली आहे. यापूर्वी विद्यार्थ्यांना ऑनलाइन अर्ज नोंदणीसाठी १४ जुलैपर्यंत मुदत देण्यात आली होती. या केंद्रीय ऑनलाइन प्रवेश प्रक्रियेअंतर्गत ऑनलाइन नोंदणी, आवश्यक कागदपत्रे अपलोड करणे ही प्रक्रिया सुरू असून यासाठी आता सीईटी सेलने २१ जुलैपर्यंत मुदतवाढ दिली आहे. यात, कागदपत्रांची पडताळणी आणि अर्ज निश्चितीसाठी ८ ते २२ जुलैपर्यंत मुदत आहे. दरम्यान, २१ जुलैनंतर नोंदणी केलेल्या विद्यार्थ्यांचे अर्ज ‘नॉन-कॅप’ फेरीसाठी ग्राह्य धरले जातील, असे सीईटी सेलने स्पष्ट केले आहे.

सुधारित वेळापत्रक
तपशील : कालावधी
- ऑनलाइन नोंदणी करणे, प्रवेशासाठी आवश्यक कागदपत्रे अपलोड करणे : २१ जुलैपर्यंत
- कागदपत्रांची पडताळणी करणे, अर्ज निश्‍चिती करणे : २२ जुलैपर्यंत
- तात्पुरती गुणवत्ता यादी जाहीर करणे : २५ जुलै
- तात्पुरत्या गुणवत्ता यादीवर आक्षेप व हरकती नोंदविणे : २६ ते २८ जुलै
- अंतिम गुणवत्ता यादी जाहीर करणे : ३१ जुलै
- अधिक माहितीसाठी संकेतस्थळ : www.mahacet.org