पुणे, ता. १६ : सार्वजनिक गणेशोत्सवाच्या पार्श्वभूमीवर ढोल-ताशा पथकांना महापालिकेने सरावासाठी जागा उपलब्ध करून द्यावी, या मागणीसाठी भारतीय जनता पक्षाचे शहराध्यक्ष धीरज घाटे यांच्या नेतृत्वाखाली शिष्टमंडळाने महापालिकेचे आयुक्त नवलकिशोर राम यांची बुधवारी भेट घेतली. शहरातील मध्य भागातील महापालिकेच्या ताब्यात असलेली मैदाने तात्पुरत्या स्वरूपात ढोल-ताशा पथकांना उपलब्ध करून द्यावीत, या मागणीचे निवेदन त्यांनी आयुक्तांना दिले. त्यावर आयुक्तांनी सकारात्मक भूमिका घेतली असून महापालिकेच्या ताब्यातील मैदाने सराव पथकांना देण्यात यावीत, अशा सूचना पालिकेच्या मालमत्ता विभाग आणि क्रीडा विभागाला दिल्या आहेत.
गणेशोत्सवाला आता राज्य महोत्सवाचा दर्जा मिळालेला आहे. त्यामुळे पारंपरिक ढोल-ताशा पथकांना सरावासाठी मैदाने उपलब्ध झाली पाहिजेत. विविध पथकांना सराव करायला जागा नसते त्यामुळे महापालिकेची मैदाने पथकांना तात्पुरत्या स्वरूपात उपलब्ध करून देण्याची मागणी करण्यात आली आहे.
शहराध्यक्ष धीरज घाटे यांच्यासमवेत माजी नगरसेवक अजय खेडेकर, बापू मानकर, रवींद्र साळेगावकर, पुनीत जोशी, सुनील पांडे, राजू परदेशी तसेच ढोल-ताशा महासंघाचे ॲड. अनिश पाडेकर व गजलक्ष्मी पथकाचे प्रमुख केतन देशपांडे उपस्थित होते.